Potavóz CET no Prezidente Ezekutivu Justisa Paz no Integridade Kriasaun, Padre Júlio Crispin, halo konferensia imprensa, iha Balide, segunda (01/03). Imajen TATOLI/Egas Cristóvão

DILI, 01 marsu 2022 (TATOLI)–Konferénsia Episkopál Timorense (CET, sigla portugés), tersa ne’e, realiza konferénsia imprensa relasiona ho sarani sira-nia preokupasaun ho situasaun Kanónika eis Padre Martinho Gusmão.

“Martinho Gusmão lakon nia Estadu Klerikal ho maneira permanente no la’ós tranzitóriu ho virtude hosi Reskritu númeru 3593/21, 13 outubru 2021, fó ba nia, konforme Cânon 290, númeru 3, C.D.C. ‘lakon nia Estadu Klerikal’, katak la’ós ona Na’i-Lulik, nia fila ona ba vida nu’udár leigu,” Potavóz CET no Prezidente Ezekutivu Justisa Paz no Integridade Kriasaun (JPIC, sigla portugés), Padre Júlio Crispin, informa, iha edifísiu CET, Balide.

Notísia relevante: Suspende hosi knaar saserdósiu, Padre Martinho prepara kompete iha Eleisaun Prezidensiál

Nune’e, konsede mós ba nia dispensa selibatu, katak livre hosi obrigasaun selibatu ka bele ona simu sakramentu matrimóniu.

“Martinho Gusmão nia la’ós de’it suspendidu hosi Ministériu Saserdotál, maibé konforme reskritu hateten no norma igreja, esklui ona hosi ezersísiu Ministériu Sagradu, bainhira lakon ona ho maneira permanente Estadu Klerikal,” nia esplika.

Ho karta númeru 3593/21, 15 outubru 2021, hosi Eminentísimu, Cardeal Luís António Tagle, Prefeito da Congregação para a Evangelização dos Povos, encoraja atu iha vida ezemplar ida nu’udár leigu, atu presta servisu útil no buras ba komunidade kristaun, liuhosi taletu sira ne’ebé Maromak haraik ona.

“Karta ne’ebé temi, la hateten explisitu kona-ba fó korajen ka fó referénsia ruma atu tama iha vida polítika ka atu kandidata ba kargu polítika ida, maski nia livre atu hili dalan ba atividade polítika hanesan kualkuer leigu kristaun sira seluk,” Amu Crispin akresenta.

Biban ne’e, Prezidente Ezekutivu JPIC, klarifika, Eis Padre Martinho Gusmão la simu karta pesoál ruma hosi Santu Padre, maibé sita de’it karta hosi Cardeal Tagle, ne’ebé haruka ho Papa Francisco nia naran, ba eis saserdote sira ne’ebé lakon ona sira-nia Estadu Klerikal tuir sira rasik, husu atu moris iha vida ezemplar ida ba komunidade.

Antes ne’e, Bispu Dioseze Baucau, Don Basílio do Nascimento, dekreta suspensaun Ministériu Saserdotál, hahú loron 20 agostu 2021 ba oin, hapara Martinho Gusmão nia atividade sira hotu ne’ebé sakramentu orden haraik ba nia atu hala’o iha Uma-kreda.

Karta ne’e bazeia ba karta ne’ebé eis Padre haruka ba Bispu Diosezanu iha loron 25 janeiru 2021, hodi husu renunsia ba Ministériu Saserdotál katak hapara nia knaar nu’udar Na’i-Lulik.

Nune’e mós, iha Loron 04 fevereiru 2021, Martinho Gusmão haruka karta ba Santu Padre hodi husu demisaun Estadu Kredikál, atu la moris ona tuir estatutu Na’i-Lulik.

Iha loron 03 fevereiru 2022, eis Padre ne’e rejista iha Tribunál Rekursu hanesan Kandidatu Prezidente Repúblika Independente ba períodu 2022-2027, hodi kompete iha Eleisaun Prezidensiál ne’ebé realiza iha 19 marsu tinan ne’e.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here