Ajénsia Cammer PC. Imajen/Espesiál

DILI, 01 marsu 2022 (TATOLI)–Ajénsia Cammer PC liuhosi empreza Incanto Group desde tinan 2020 fasilita ona timor-oan besik 4.000 bá serbisu iha Irlanda no Inglatera.

“Ema hirak ne’e maioria bá serbisu iha Irlanda no Inglatera, ne’ebé ami akompaña sira-nia prosesu, atu nune’e labele hetan problema iha dalan,” Diretór Cammer PC, Rui Pires, relata hafoin reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Notísia relevante: MNEK prepara dokumentu viajen únika fasilita timor-oan pasaporte inválidu

Nia dehan, empreza bele serbisu hamutuk ho Governu atubele fó apoiu ba timor-oan sira ne’ebé atu trata dokumentu hodi serbisu iha rai-li’ur no rai-laran.

“La fasil trata dokumentu sira iha tempu pandemia COVID-19, ne’ebé mak nasaun tomak taka sira-nia aeroportu. Maibé ami buka maneira atu serbisu ho Governu Timor-Leste no nasaun refere bele koopera di’ak hodi fasilita sidadaun sira,” nia akresenta.

Tuir Responsável Incanto Group ne’e, timor-oan sira ne’ebé utiliza pasaporte Timór hakarak tama iha Eropa tanba hetan apoiu hosi família.

“Presiza ita hotu hatene, sira bá tanba hetan apoiu hosi família. Atu dehan sidadaun hotu iha direitu ba nasaun Europa bazeia ba lei ne’ebé eziste, katak balun objetivu hamutuk ho sira-nia família no balun bá pasiar. Sira hasoru difikuldade bazeia ba sirkunstánsia, entaun ajénsia nia esforsu atu fahe informasaun klaru kona-ba risku ne’ebé sei hasoru ba sira molok arranka sai hosi Timór,” Rui Pires esplika.

Biban ne’e, Xefe Governu apresia ho inisiativa ne’e tanba benefisia ba ema hotu, liliu ekonomia família maski hetan dezafiu barak, maibé nu’udar timor-oan orienta atu avansa ba oin.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan