Lixu movel. Imajen espesial

DILI, 28 fevereiru 2022 (TATOLI)–Xefe Aldeia Manumata, Beatris da Costa Silva, husu governu atu apoiu kaixote lixu movel, tanba fatin lixu haat ne’ebé iha nia aldeia hetan estragus bainhira mosu inundasaun liubá.

Notísia relevante: AMD sei koloka kaixote lixu 4000 iha sidade Dili

“Hosi problema ne’e, iha tinan 2020 ami propoin ona ba Governu no sira dehan atu fó lixu movel, maibé to’o agora ita-nia Governu seidauk mai tau”, nia dehan ba TATOLI iha nia fatin, ohin.

Nia informa, aldeia Manumata durante ne’e lixu fatin hamutuk haat, hanesan ida iha Rate Bidau Santana no seluk iha mota ibun.

“Maibé ho inundasaun foin dadaun ne’e konsege sobu hotu ita-nia lixu fatin sira ne’ebé besik mota ibun, nune’e mós lixu fatin besik Rate Bidau Santana mós dadaun ne’e aat ona. Ho problema ne’e, ami propoin ona ba Governu atu tau lixu movel, ne’ebé ita hein Governu nia programa atu tau lixu movel ne’e”, katak.

Apolináriu Rodrigues, abitante fatin ne’ebá hatete kaixote lixu importante tebes, nune’e fasilita komunidade atu la soe fo’er arbiru.

“Ami husu Governu tau lixu fatin iha ne’e, tanba lixu fatin iha ne’e no aldeia mota-klaran to’o ba dalan ibun laiha, tanba ne’e ita-nia maluk sira soe lixu iha mota laran no dalan ninin”, katak nia foin lalais ne’e iha suku Bidau Santa-ana.

Nia informa, durante ne’e aldeia Manumata nia lixu fatin laiha, entaun komunidade kontribui osan hodi halo lixu fatin ida iha rate oin, nune’e komunidade bele soe lixu iha nia fatin.

Nia husu ba governu atu instala lixu fatin ba kada aldeia. “Governu presiza tau atensaun, esplika mós ba ita-nia komunidade atu soe fo’er iha nia fatin, tanba daudaun ne’e moras dengue sae maka’as,” nia afima.

Jornalista : Nelia Fernandes

Editora     : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here