Diretór Servisu Saúde munisípiu Viqueque, Francisco de Carvalho. Imajen TATOLI/Vitorino Lopes da Costa

VIQUEQUE, 28 fevereiru 2022 (TATOLI)–Diretór Servisu Saúde munisípiu Viqueque, Francisco de Carvalho, relata to’o agora saneamentu bázika iha munisípiu Viqueque seidauk atinje di’ak tanba problema falta bee-moos.

“Atu solusiona problema saneamentu bázika iha munisípiu Viqueque, parte saúde munisipál rekomenda ba ministériu relevante sira hodi koloka orsamentu ba bee-moos. Nune’e ita bele hasa’e presentajen no utilizasaun bee-moos hodi halo prevensaun ba moras sira seluk,” Diretór servisu munisipál informa ba Agência TATOLI, iha ninia knaar fatin, Boro-mata, segunda ne’e.

Notísia relevante: Uma-kain 43 iha Viqueque kontribui osan dada rasik bee-moos

Nia observa, durante ne’e iha postu administrativu Viqueque villa de’it, loron ida maka bee-moos tama dala-ida, tanba distribuisaun bee-moos forsa kiik, ne’ebé situasaun ne’e difikulta tebes komunidade lokál.

“Ita ko’alia kona-ba saneamentu bázika, liuliu sintina, bazeia ba estatístika hatudu katak hosi munisípiu Ainaro, Baucau  no Viqueque foin atinje 20-39%. Iha Viqueque ne’e tun nafatin tanba bee-moos mak sai kestaun ba saneamentu báziku,” nia akresenta.

Enkuantu, munisípiu seluk hanesan Bobonaro, Covalima, Ermera, Lautém, Manufahi no Oé-Cusse, kondisaun saneamentu báziku atinje ona 40-59,9% tanba área hirak ne’e distribuisaun bee la’o di’ak.

“Ho ida-ne’e maka sira atinje porsentu a’as liu kompara ho Viqueque ne’ebé seidauk to’o ne’ebá, tanba ne’e presiza hasa’e alokasaun orsamentu ba kestaun saneamentu báziku,” Diretór ne’e sujere.

Alokasaun orsamentu iha tinan 2022 ba munisípiu Viqueque, iha programa água no saneamentu hamutuk $91.025.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here