Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo. Imajen TATOLI/Francisco Sony

DILI, 28 fevereiru 2022 (TATOLI)--Ministru Asuntu Parlamentár no Komunikasaun Sosiál (MAPKOMS), Francisco da Costa Jerónimo, segunda ne’e, relata progresu serbisu baPrimeiru-Ministru (PM), Taur Matan Ruak.

“Ha’u mai relata progresu serbisu durante semana ida nian ba Primeiru-Ministru. Serbisu ne’ebé mak hala’o ona mak hanesan subsídiu ba jornalista sira iha difikuldade intermu administrativu,” Ministru informa ba Jornalista sira, hafoin ramata reuniaun semanál ho Xefe Governu, iha Rezidénsia Farol.

Notísia relevante: Francisco Jerónimo kontinua hetan fiar ba Prezidente FFTL

Aleinde ne’e, kona-ba atividade iha Parlamentu Nasionál hanesan lei sira ne’ebé aprova.

Biban ne’e, Xefe Ezekutivu mós kongratura Ministru Asuntu Parlamentár no Komunikasaun Sosiál tanba reeleitu nu’udar Prezidente Federasaun Futeból Timor-Leste (FFTL).

“Primeiru-Ministru kongratura ha’u tanba realeitu hodi kontinua lidera FFDTL. Nia husu atu kontinua serbisu tanba presiza duni buat ne’ebé atu realiza, ne’ebé Governu no públiku mós mehi oinsá mak mellora profesionalizmu iha FFTL, liuliu jogadór no infraestrutura sira,” nia akresenta.

Nune’e, atuál Prezidente FFTL ne’e relata ba PM ligadu ho hasoru malu entre entidade Federasaun nian ho reprezentante FIFA no Governu, hodi finaliza dokumentu ofisiál sira molok realiza projetu boot sira iha Timor-Leste, liuliu kampu sira.

Jornalista : Antónia Gusmão

Editora     : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here