Poste eletrisidade média tensaun ne'ebé monu tanba impaktu hosi udan boot iha área Nunura, suku Tapo-Memo, Maliana, munisípiu Bobonaro. Imajen Tatoli/Sergio da Cruz.

BOBONARO,28 fevreiru 2022 (TATOLI) – Korrente mota difikulta ekipa téknika Eletrisidade Timor-Leste, Empreza Públika (EDTL, E.P) munisípiu Bobonaro halo normalizasaun ba poste haat iha área Nunura, suku Tapo-Memo, postu administrativu Maliana, munisípiu Bobonaro.

“Ami agora halo ona intervensaun, maibé atu dada lina ou kabu ne’ebé mak hetan estragus atu ultarpasa ba Mota sorin labele,tanba korrente bee maka’as liu,ne’ebé ita hein mota menus tia mak foin bele dada kabu ba sorin hodi normaliza fila fali,” Supervizór EDTL, E.P Munisípiu Bobonaro, Mário de Jesus, informa ba Agência Tatoli, iha Nunura, segunda ne’e.

Korrente bee mota difikulta tékniku sira atu halo normalizasaun ba poste média tensaun haat iha área Nunura, suku Tapo-Memo, postu administrativu Maliana, ne’ebé hetan estraga hosi udan-boot ne’ebé akontese iha sábadu semana kotuk.

Maske hasoru difikuldade iha terrenu maibé la’ós sai obstákulu ba tékniku EDTOL sira  atu fornese liña eletrisidade ba kliente sira, tanba ne’e provizóriu  só bele de’it tesi  kotu kabu média tensaun no troka poste haat ne’ebé tohar iha komunidade nia natar laran, hodi hein to’o korrente mota menus mak foin normaliza hikas.

Dezde dezastre naturál ne’e, EDTL,E.P seidauk bele fornese enerjia elétrika ba konsumidór sira iha área fronteira  hanesan, postu administrativu Balibo no Atabae ho totál suku hamutuk haat.

“Ha’u husu ba kliente sira iha Balibo no Atabae, ita hotu tenke hein ho pasiénsia uitoan lai, tanba korrente mota seidauk fó biban mai ami halo serbisu, loron ida, rua ka tolu ida hanesan ne’e mota menus ona, ami dada hotu tiha ahi, bele lakan normál hanesan bainbain,” nia fo hanoin.

Supervizór Munisípiu Bobonaro ne’e fó-sai katak, iha Nunura provizoriu ahi iha postu administrativu Bobonaro Vila mós mate hela, tanba poste média tensaun rua monu ba rai.

Daudaun ne’e funsionáriu EDTL Munisípiu Bobonaro hamutuk na’in-20. Hosi númeru ne’e na’in-10 destaka iha Maliana Vila, fahe ba tékniku ne’ebé serbisu iha parte distibuisaun nian hamutuk na’in-ualu no restante kobre iha Atabae, Balibo, Cailaco, Bobonaro no Lolotoe.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here