Eskola Ensinu Sekundáriu Tékniku Vokasionál, Becora. Imajen TATOLI/Nelia Fernandes

DILI, 28 fevereiru 2022 (TATOLI)–Diresaun Servisu Edukasaun Dili rejista ona uma unidade 27 mak eziste iha área eskola haat.

Eskola ne’ebé iha uma kompostu hosi Eskola Ensinu Báziku Filiál (EBF) terseiru siklu Sergio Vieira de Melo iha uma 12, Eskola Ensinu Sekundáriu Jerál (ESJ) 12 Novembru iha uma rua, Eskola 10 Dezembru Comoro iha uma sia, no Eskola EBF Duque de Caxias Bemori iha uma haat.

“Dadus eskola 27 ne’e ita simu hosi parte eskola, ne’ebé ba oin ita husu autoridade suku sira atu serbisu hamutuk ho parte eskola atu alista lalais eskola sira ne’ebé mak komunidade okupa, atu nune’e ita bele aprezenta ba Autoridade Munisípiu Dili hodi buka solusaun no rezolve dala-ida de’it,” Diretór Servisu Edukasaun Dili, Carlito da Silva, informa ba Agência TATOLI, iha ninia knaar fatin, Comoro, segunda ne’e.

Notísia relevante: Servisu Edukasaun Dili simu dadus uma-kain haat okupa fasilidade EBF Bemori

Tuir Carlito, mekanizmu ne’ebé Diresaun Servisu Edukasaun Dili implementa, daudaun iha prosesu levantamentu dadus, ne’ebé la haree ona ba kuantidade família no ninia membru ne’ebé okupa rai eskola, maibé bazeia de’it ba totál uma ne’ebé eziste iha eskola sira.

“Ha’u husu ona ba eskola no Autoridade suku sira iha Dili atu halo identifikasaun ba uma, labele halo ba família, se lae laduun di’ak tanba bele mosu manipulasaun iha prosesu ba oin,” nia akresenta.

Enkuantu, prosesu ne’e hahú ona no Diresaun Servisu Edukasaun Dili realiza ona enkontru ho Administradór postu no Xefe suku sira, ne’ebé daudaun hahú ona identifikasaun ba eskola ida-idak.

“Karik komunidade balun mak okupa hela fasilidade eskola nian, bele hasai sira-nia dadus atu Governu buka solusaun, tanba Governu maka iha meiu atu rezolve saida de’it maka akontese iha nasaun ne’e,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here