Kandidatu Prezidente Repúblika númeru sorteiu 6, Francisco Guterres Lú Olo. Imajen/Julião Guterres

DILI, 28 fevereiru 2022 (TATOLI)—Kandidatu Prezidente Repúblika periódu 2022-2027 ho númeru sorteiru 6, Francisco Guterres ‘Lú Olo’, hateten sei kontinua promove diálogu ho parte hotu atu bele diskute problema ruma liga ba nasaun nian hodi lori dezenvolvimentu  ba povu tomak iha Timor-Leste.

“Bainhira povu fó fiár sai Prezidente Repúblika mak ha’u hakarak promove diálogu permanente nafatin ho órgaun soberania sira seluk, partidu polítiku no lidér sira karik iha diferensa polítika no hanoin sei buka nafatin atu rezolve,” Kandidatu Lú Olo hateten iha intervensaun bainhira lansa sede nasionál ba nia kandidatura iha Luz Klarita, segunda ne’e.

Atuál Prezidente Repúblika ne’e hateten, durante mandatu besik tinan haat ho balun hala’o ona diálogu balun susesu no balun la susesu maibé vontade ninian sei la lakon, nune’e iha re-kandidata an bainhira nafatin hetan fiar hosi povu mak kontinua promove diálogu ho parte hotu halibur sira-nia hanoin hamutuk fó liman ba malu lori dezenvolvimentu nasaun nian ba oin.

“Importante mak problema nasaun nian tenke trata hanesan problema nasaun nian la’ós ba fali partikulár,” nia dehan.

Nia mós sei kumpre de’it konstituisaun ho lei sira no la hakruk ba votante partidu ida-nian, no kompeténsia PR ida mak promulga ba veta lei ne’ebé hosi Parlamentu Nasionál ka dekretu lei hosi Governu.

Lú OLo, dehan hanesan durante ne’e lei sira-ne’ebé Parlaementu Nasionál (PN) haruka ba nia parte balun veta hodi haruka fila hodi hadi’a tanba lei ida tenke serve ba povu uza rasionál nune’e bele promulga.

Nu’udar komadante forsa armada, nia hateten, durante ne’e halo tiha ona buat balun hanesan liuhosi lejislasaun Parlamentu Nasionál no Governu haruka ba Prezidente Repúblika atu moderniza ita-nia forsa armada iha kontextu estratéjiku defeza seguransa, ne’ebé hanesan Timor-Leste nasaun indepedente bele ki’ik.

Nune’e, liuhosi konseitu estratéjiku hahú daudaun atu oinsa moderniza no mudansa ne’ebé halo ba titulár no ierárkia militár akontese liu-ba pasu importante ida, tan ne’e instituisaun forsa armada konta nafatin bainhira karik eleitu ba períodu tinan lima mai kontinua fó prioridade.

Iha mandatu mai sei hamutuk ho Governu no PN fó hanoin uzu rasionál ba fundu mina-rai hanesan fonte prinsipál oinsá harii ekonómia baze presiza ba duni povu.

Tan ne’e, nia promete sei sai Xefe Estadu ba povu tomakhodi garante pás no estabilidade hodi hala’o dezenvolvimentu iha Timor-Leste.

Prezidente Repúblika iha lejitimidade direta no relasaun instituisionál ho PN no Governu, no klaru PR iha nia kompeténsia rasik atu hola desizaun saida de’it ba Estadu.

Xefe Estadu, rekuñese durante mandatu besik tinan haat bo balun simu dezafiu bele klasifika ba aspeitu tolu hanesan, ida mais polítiku, pandemia COVID-19 no dezastre naturál 04 abríl 2021.

“Hanesan durante pandemia iha Timor-Leste desizaun Estadu Prezidente Repúblika dekreta Estadu Emerjénsia hodi salva povu,” nia dehan.

Besik kompleta mandatu ba tinan lima, Francisco Guterres hateten dala ida tán atu kandidata fila-fali sente kontente tanba sai hosi dezafiu ida atu la’o hamutuk dala ida tan ho povu.

Iha konstituisaun RDTL, artigu 74 (Definisaun), iha alinéa 1 hateten Prezidente Repúblika mak Xefe-Estadu, simbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár,

Iha alinéa 2 haktuir, Prezidente Repúblika mak Komandante aas liu Forsa Armada nian.

Iha artigu 75 (Elejibilidade), iha alinéa 1  haktuir  bele tuir kandidatura ba Prezidente Repúblika sidadaun timor-oan sira-ne’ebé, iha ilas hotu tuir mai ne’e:

  1. a) Sidadaun nanis;
  2. b) Iha tinan mínimu 35;
  3. c) Ho kapasidade di’ak;
  4. d) Ne’ebé hetan proposta husi sidadaun hili-na’in mínimu nain rihun lima.

Iha alinéa 2 hateten Prezidente-Repúblika kaer mandatu to’o tinan lima nia laran no ninia knar ramata bainhira Prezidente foun simu pose.

Alinéa 3 haktuir Prezidente Repúblika nia mandatu bele hetan renovasaun dala-ida de’it.

Artigu 76 (Eleisaun), iha alinéa 1 hateten atu sai Prezidente Repúblika sei hili tuir sufrájiu universál, livre, diretu, sekretu no ida-idak.

Iha alinéa 2 dehan eleisaun Prezidente Repúblika nian banati tuir sistema manán ho votu barak liuhosi votu hotu-hotu ne’ebé válidu, la sura votu ne’ebé la válidu.

Alinéa 3 haktuir bainhira kandidatu sira hetan votu hanesan, sei hala’o fali eleisaun dala ida tan, liu tiha loron tolu nulu (30) hosi loron votasaun ida foin liubá kotuk.

Iha alinéa 4 hateten, iha eleisaun daruak, kandidatu na’in-rua ne’ebé hetan liu votu no la hasai sira-nia kandidatura mak bele tuir.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here