Ospitál Referénsia Covalima. Imajen TATOLI/Eugénio Pereira.

DILI, 28 fevereiru 2022 (TATOLI)-Relatóriu fiskalizasaun husi Komisaun F ne’ebé trata asuntu Saúde, Seguransa Sosiál no Igualdade Jéneru rejista Ospitál Referénsia Covalima daudaun ne’e, enfrenta hela problema falta ekipamentu no rekursu umanu, tanba ne’e, Governu persiza solusiona.

Deputada Helena Martins, ne’ebé relata relatóriu ne’e iha plenária Parlamentu Nasionál hateten Komisaun F halo fiskalizasaun ne’e iha loron 29 fulan-setembru to’o 01 outubru 2021 hodi identifika Ospitál Referénsia Covalima sei falta mákina X-ray.

Alende, mákina X-ray, sei falta mákina “incinerator” X-rated  ho ninia funsaun atu destroy lixu médiku tanba oras ne’e la funsiona ho diak.

“Rekomenda atu fó atensaun sériu ba fatór rekursu umanu ho ekipamentu ospitál hanesan mákina X-ray, ho mákina enseneradór hodi sunu lixu médiku,’’ Nia relata segunda ne’e.

Reprezentante povu iha PN ne’e dehan kona-ba asuntu falta rekursu umanu, Komisaun F deteta ninia kauza maka pesoál balun tama ona idade reforma no balun daudaun ne’e kontinua hela sira-nia estudu iha universidade sira, entaun afeta ba prosesu atendimentu ba pasiente sira.

Ospitál Referénsia Covalima iha mákina X-ray portail ida ho kapasidade atu bele halo teste de’it ba pasiente hamutuk ema na’in 10  tanba persiza atu karega beibeik.

Maibé, mákina boot ne’ebé antes ne’e hetan doasaun husi nasaun Slovakia liuhosi misaun INTERFET iha tinan 1999 liubá agora daudaun avaria ona.

Ospitál Referénsia Covalima iha médiku espesialista hamutuk ema na’in hitu, médiku jerál ema na’in 16, enfermeiru 44, enfermeiru anestezia na’in  neen, parteira 20, tékniku laboratóriu 13, farmasista hitu, tékniku radiolojia ema na’in hitu.

Tékniku fisioterapia ema na’in rua, medikál record ema na’in neen, akonselladó ba moras HIV-SIDA ema na’in rua, no pesoál kuidadu saúde ba programa tuberkoluze iha ema na’in ida.

Hatán ba preokupasaun ne’e, Governu liu hosi Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, hateten sei enkamina preokupasaun ne’e ba iha Ministériu Saúde hodi rezolve.

Jornalista: Nelson de Sousa

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here