Uma komunidade ne’ebé hela iha mota ninin iha área Comoro hetan estragus, hafoin udan boot iha foho kasnafar, halo mota tuun hodi rezulta inundasaun, sesta (25/02). Imajen TATOLI/António Dasiparu

DILI, 28 fevereiru 2022 (TATOLI)–Governu liuhosi Sekretaria Estadu Protesaun Sivil (SEPS) sei la fó apoiu dala-rua ba vítima dezastre naturál.

“Sekretaria Estadu Protesaun Sivil iha dadus kompletu ba sira ne’ebé iha tinan kotuk hetan ona apoiu iha fatin ne’ebé hanesan no agora kontinua filafali rejista nafatin, ami deside atu la fó tan apoiu, tanba antes ne’e informa ona katak labele harii no hela tan iha fatin risku,” Sekretáriu Estadu Protesaun Sivil, Joaquim José Gusmão dos Reis Martins, hateten, hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Notísia relevante: PM preokupa progresu rekuperasaun estragu infraestrutura impaktu dezastre naturál

Ekipa Protesaun Sivil sempre komunika ho populasaun hodi sosializa nafatin kona-ba fatin risku dezastre, ne’ebé Governu bandu atu labele hela.

“Realidade komunidade seidauk iha konsiénsia atu labele harii uma iha fatin risku no bainhira akontese dezastre sempre sai vítima dezastre,” nia akresenta.

Aleinde ne’e, uma ne’ebé mak iha fatin risku dezastre, Governu deside atu labele fó apoiu tanba fatin ne’e risku dezastre.

“Signifika karik sira bele muda ba fatin ne’ebé laiha risku fó hatene ba Sekretaria Estadu Protesaun Sivil sei tun ba halo levantamentu iha terrenu no haree katak la’ós fatin ba dezastre, ami nafatin fó apoiu,” Governante ne’e tenik.

Enkuantu, bazeia ba relatóriu SEPS to’o loron 27 fevereiru 2022, ema na’in-14 mak lakon vida no kanek ida durante dezastre naturál iha janeiru no fevereiru.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here