Bispu Dioseze Maliana, Don Norberto do Amaral. Imajen/Tatoli.

DILI, 28 janeiru 2022 (TATOLI)—Diretór Klínika Oospitál Nasionál Guido Valadares (HNGV, sigla portugés), Marcelino Correia, hateten Bispo Dioseze Maliana Don Norberto do Amarál, daudaun ne’e baixa iha sala Intensive Care Unit (ICU) tanba sofre hipertensaun ne’ebé to’o 190-resin.

“Ita-nia amu Bispu Dioseze Maliana ne’ebé mai-husi Maliana horikalan, hafoin ataka tensaun sa’e to’o 190-resin, hodi nia ko’alia ibun toos, hafoin transporta mai iha ospitál diretamente baixa iha ICU. Hafoin médiku sira halo kedas atendimentu no agora daudaun kondisaun estavel fila-fali tanba tensaun hahú tun ona”, Diretór Klíniku HNGV ne’e hateten ba jornalista sira iha nia knaar fatin, segunda ne’e.

Maske nune’e, nia dehan daudaun ne’e kondisaun saúde Don Norberto do Amarál hahú normál fila-fali, hafoin hetan tratamentu hosi médiku espesialista sira.

“Ataka tensaun (hipertensaun) ne’e afeta tanba durante ne’e sofre kardiovaskular tanba uluk tau kadeli iha rai liur no nia mós nafatin halo tratamentu ba moras fuan nian no moras tensaun nian.  Ida ne’e mak ita identifika, nune’e situasaun sira ne’e afeta nian halo nia tensaun sa’e hodi tama ba stroke (acidente vascular cerebral) ne’ebé halo nia ibun toos atu ko’alia”, nia akresenta.

Maibé, Diretór ne’e dehan daudaun médiku sira nafatin halo observasaun no halo tratamentu ba Bispu no parte klínika nian hein nafatin  informasaun husi médiku sira.

“Ohin, ha’u ko’alia ho médiku sira katak iha indikasaun ruma atu transfere dehan para ita buka solusaun tanba Bispu ne’e uluk halo tratamentu ba nia fuan iha Malázia, maibé se karik transfere ne’e médiku sira mak deside fatin. Maibé daudaun ne’e ita-nia medikamentu no ekipamentu sufisiente hela hodi halo atendimentu”, nia akresenta.

Jornalista : Felicidade Ximenes  

Editór      : Florencio Miranda Ximenes

PUBLISIDADE HUSI MTCIiklan