Diretór Ezekutivu Centro Nacionál Chega (CNC-Sigla Portugués), Hugo Maria Fernandes. Imajen Tatoli/Francisco Sony

DILI, 28 fevereiru 2022 (TATOLI)—Diretór Ezekutivu Sentru Nasionál Chega (CNC, sigla portugés), Hugo Maria Fernandes, informa hahú 2019 to’o 2022 CNC rejista ona vítima reparasaun hamutuk 2000 resin.

“Ita halo ona rejista bazea ba baze dadus rejista foun foin mak atinji 2000 resin, maibé rejista ne’e seidauk hotu, tanba uluk CAVR lansa relatóriu iha 2005 laiha instituisaun ida mak toma konta atu kontinua rejista, la hanesan ho veteranu sira ne’ebé Komisaun Omenajen rejista maibé vítima la iha”, katak nia iha knaar fatin, segunda ne’e.

Nia hatutan tan bainhira CNC foin harii iha 2017 mak foin estabelese fali baze dadus ida, nune’e foin haree fila-fali hanesan sira ne’ebé uluk fó ona sasin ba CAVR, ne’ebé dadaun ne’e ita halo ona rejista foun foin mak atinji 2000 resin.

Nia informa, iha Ministériu Antigu Kombatente dadaun ne’e halo hela rejista ba ema mate, entaun aban bainrua CNC bele hetan dadus, liuhosi halo kooperasaun.

“Tanba, uluk CAVR rona de’it ema kuaze 8000, maibé 8000 ne’e hotu-hotu la’os vítima, tanba balun sasin, tanba ne’e ita presiza halo rejista foun. Maibé, atu halo prosesu rejista ne’e mak CNC koopera ho Asosiasaun Vítima sira tanba sira iha dirijente no pontu vokál to’o nivel postu, sira mak lori formuláriu ne’e ba rejistu fila-fali, ne’ebé to’o agora ita rejista kuaze rihun rua, maibé ida ne’e la’os lista finál, tanba prosesu ba rejista ne’e sei la’o hela”, nia katak.

Hosi rihun rua ne’e, hira mak hetan ona apoia, nia afirma, atribuisaun ne’ebé mak la’o hahú 2019 hosi Ministériu Solidaridade no Inkluzaun Sosiál (MSSI) tinan-tinan fó apoia ba vítima reparasaun hamutuk 160, maibé sira ne’e la’os permanente. Tanba, iha tinan ida dadus ne’e sempre iha mudansa, hanesan iha 2020 ema seluk, 2021 ema seluk, entaun hosi lista ne’e tinan-tinan CNC hamenus.

“Ezemplu tinan ne’e mak ita hetan duni uma 800 hosi PNDS, entaun ita hetan kuaze rihun ida resin mak hetan ona apoia hosi programa reparasaun ne’e”, nia esplika.

Entretantu, tuir dadús hosi Diretór CNC informa, dadus ne’ebé CNC rejista hamutuk 2000 resin ne’e hahú hosi 2019 to’o 2022. Tanbá iha 2017 CNC hahú iha klaran, entaun iha 2018 mak CNC foin konvida Sosiedade Sívil, Governu no Ministériu sira ne’e mai hodi estabelese rejista foun, entaun iha meadu 2018 CNC foin hahú fila-fali rejista, liuhosi Asosiasaun Vítima no Autoridade Lokál ne’ebé CNC distribui formuláriu mak sira rejistu hodi fó fali mai iha CNC.

Jornalista : Nelia Fernandes

Editora     : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here