Estrutura no membru PDC akompaña ho Kandidatu PR ba períodu 2022-2027, Premiadu Nobel da Paz, José Ramos Horta, halo konferénsia imprensa, iha edifísiu PDC, Bairro-Pité, domingu (27/02). Imajen TATOLI/Felicidade Ximenes

DILI, 27 fevereiru 2022 (TATOLI)—Estrutura no membru Partido Democrata Cristão (PDC) deklara ofisialmente apoiu Kandidatu Prezidente Repúblika (PR) ba períodu 2022-2027, Premiadu Nobel da Paz, José Ramos Horta.

Tuir Prezidente PDC Interinu, Domingos da Costa, ne’ebé akompaña mós hosi Sekretáriu Jerál, Francisco de Araújo, desizaun apoiu bazeia ba reuniaun Konsellu Diretivu Nasionál iha loron 19 fevereiru 2022.

“Partido Democrata Cristão ho estrutura másimu hosi nível nasionál to’o suku fó apoiu totalmente ba Kandidatu José Ramos Horta.  Ami haree no observa katak iha fatór importante lima ne’ebé kesi metin hodi fó apoiu, dahuluk Horta iha kapasidade diplomasia nível altu no koñesidu iha mundu interasionál iha prosesu luta ba ukun rasik-an no to’o agora mundu sei fiar nafatin,” Prezidente PDC Interinu hateten liuhosi konferénsia imprensa iha edifísiu PDC, Bairro-Pité, domingu ne’e.

Notísia relevante: Kandidatu Ramos Horta rejista ona iha Tribunál Rekursu

Daruak, estrutura partidu konsidera Horta nu’udar Premiadu Nobel da Paz, datoluk iha esperensia hanesan eis Prezidente Repúblika períodu 2007-2012 ne’ebé konsege hamutuk ho Kay Rala Xanana Gusmão rezolve krize iha tinan 2006 no lori dezenvolvimentu ba povu.

Dahaat, grupu ne’e konsidera Horta nu’udar Líder mundiál ne’ebé okupa pozisaun nu’udar Membru Konsellu Seguransa iha Organizasaun Nasaun Unida (ONU)  no Reprezentante Espesiál ONU ba iha Guinea-Bissau no dalimak, bele repozisaun Konstituisaun no hadi’a imajen Timor-Leste iha mundu.

“Bazeia ba razaun hirak ne’e, estrutura PDC la dúvida no apela ona militante sira atu ezerse sira-nia direitu hodi vota ba Kandidatu José Ramos Horta iha loron 19 marsu 2022,” nia akresenta.

Iha fatin hanesan, Premiadu Nobel da Paz, José Ramos Horta, agradese ba apoiu ne’e no hein líder partidu no membru sira bele vota ba nia.

“Imi ba vota labele sala, haree buletin votu ne’e hahú hosi okos, ha’u-nia númeru 14, tanba númeru ne’e nu’udar númeru via-sakra ba istoria Na’i Jesus Kristu, tanba númeru ne’e mak refleta ba Na’i Jesus Kristu nia istória mate no númeru resorisaun ba sarani Katólika hodi hamutuk hadi’a filafali imajen nasaun Timor-Leste ninia demokrasia, no hanesan númeru sorteiu di’ak ba ita-boot sira-nia partidu kristaun,” Horta apela

Nune’e, nia dehan, Timor-Leste presiza hametin filafali Estadu Direitu Demokrátiku ho loloos no hadi’a hikas ekonomia.

“Labele monu ba beibeik no hasa’e kreximentu ekonomia hodi redús kiak no buka rezolve problema juventude no estudante sira iha Timor-Leste,” nia akresenta.

Jornalista : Felicidade Ximenes

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here