MOHAN deklara apoiu Kandidatu PR, José Ramos Horta, iha Kampu Alor, domingu (27/02). Imajen TATOLI/Felicidade Ximenes

DILI, 27 fevereiru 2022 (TATOLI)—Movimentu Oé-cusse oan hamutuk ho juventude no estudante (MOHAN) munisípiu 12 prontu fó apoiu ba Kandidatu Prezidente Repúblika (PR) períodu 2022-2027, José Ramos Horta, hodi restaura estabilidade polítika.

“MOHAN harii ho objetivu hakarak ajuda Timor-Leste, ne’ebé presiza restaura estabilidade politika-konstitusionál atu hamosu Governu lejítimu ne’ebé bele rekupera fali ekonomia iha ita-nia rain,” Koordenadór  MOHAN, Zecafriado A. Coa, hateten iha  ninia diskursu bainhira halo konsolidasaun iha kampu futuból Kampu Alor, domingu ne’e.

Biban ne’e, movimentu hato’o lamentasaun ho situasaun ne’ebé akontese iha rai-laran.

“MOHAN lamenta ho instabilidade governativa no aktu asaltu poder iha Parlamentu Nasionál, ne’ebé fó efeitu negativu ba dezenvolvimentu infraestrutura, ne’ebé rezulta ekonomia Timor-Leste monu. Tanba ne’e, MOHAN konsidera dalan atu rekupera ekonomia no reativa dezenvolvimentu fíziku mak restaura estabilidade polítika no reimpoin orden konstitusionál,” Reprezentante movimentu ne’e dehan.

Notísia relevante: CNRT deside kandidata Horta kompete iha Eleisaun Prezidensiál períodu 2022-2027

Iha fatin hanesan, Koordenadór Partidu Congresso Nacional de Reconstrução de Timor (CNRT) iha Rejiaun Administrativa Espesiál Oé-cusse Ambeno (RAEOA), Firmino Taek, agradese tanba juventude sira hahú unidade hodi fó apoiu ba Horta no Xanana Gusmão.

“Só Horta no Xanana mak bele rezolve problema iha Timor-Leste. Movimentu no partidu polítiku hotu ne’ebé apoiu sei fó vitória ba líder nasionál no mundiál na’in-rua ne’e,” Koordenadór afirma.

Nune’e mós, Xefe suku Kampu Alor, Alcina Carvalho dos Santos, agradese ba Horta tanba bele vizita sira hodi sosializa programa ba povu.

“Daudaun ne’e, povu liu-liu juventude sira iha Timor-Leste presiza liu mak kampu traballu hodi ajuda redús númeru dezempregu iha Timor-Leste,” Xefe suku hateten.

Nune’e, Autoridade suku ne’e husu sé de’it mak kaer ukun, presiza  kria kampu traballu ba povu hodi juventude sira bele hetan serbisu ho dignidade.

Iha parte seluk, Koordenadór Partidu CNRT munisípiu Dili, Luís Ximenes Caldeira, otimista partidu ne’e sei manan iha Dili.

“Dili ita lalika dúvida ona, CNRT manan ona, Tanba Dili knuuk ba CNRT no povu hatene momos krize polítika ne’ebé akontese,” Kordenadór Partidu CNRT dehan.

Nia dehan, estrutura partidu CNRT iha Dili sei kontinua serbisu maka’as hodi halo atividade door to door.

Kandidatu PR, Premiadu Nobel da Paz, José Ramos Horta, agradese ba konfiansa MOHAN.

“Ha’u eleitu karik, ita rezolve problema violasaun Konstitusaun nian no sei mosu eleisaun antisipada agora, sei la kria krize ruma, tanba situasaun kona-ba disolusaun Parlamentu ne’e normál iha demokrasia Timor-Leste no mundu demokrátiku,” Horta tenik.

Antes ne’e, iha loron 23 janeiru 2022, Partidu CNRT realiza konferénsia nasionál hodi deside kandidatu hosi partidu atu kompete iha Eleisaun Prezidensiál períodu 2022-2027, ne’ebé sei realiza iha loron 19 marsu tinan ne’e, nune’e hili José Ramos Horta (maski la’ós hosi kuadru partidu), ho kondisaun balun ne’ebé hatuur ona iha rezolusaun ne’ebé aprova ona hosi konfrensista sira momentu ne’ebá.

Partidu CNRT iha espetativa, PR eleitu bele komprometidu atu halo reforma iha setór judisiáriu, nune’e bele garante no asegura aplikasaun lei no orden, liuliu bele garante justisa tuir Konstituisaun no lei sira haruka, inklui kondisaun seluk tan.

Jornalista : Felicidade Ximenes

Editora     : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here