Anin sobu uma iha aldeia Natardik, suku Dato-tolu. Imajen/Espesiál

COVALIMA, 27 fevereiru 2022 (TATOLI)--Servisu Protesaun Sivil munisípiu Covalima liuhosi Diresaun Dezastre Naturál, rejista hosi fulan-janeiru to’o fevereiru ne’e, família hamutuk 26 sai vítima ba dezastre naturál.

“Dadus vítima dezastre naturál ne’e rejista hosi postu administrativu sira hanesan Fatululik, Fohorem, Maucatar, Zumalai, Tilomar no Suai vila hamutuk 26,” Koordenadór Protesaun Sivil Covalima, Dinis Pereira, informa ba Agência TATOLI, iha Santarosa, domingu ne’e.

Notísia relevante: Uma kain 62 iha Covalima afetadu ba dezastre naturál

Koordenadór Protesaun Sivil Covalima, Dinis Pereira. Imajen TATOLI/Celestina Teles

Dezastre naturál ne’ebé akontese hanesan anin sobu uma balun a’at totál no balun a’at kma’an, ne’ebé família hamutuk 26 mak hetan ona apoiu emerjénsia hanesan ai-han no materiál balun.

Hafoin apoiu emerjénsia, ekipa mós halo ona verfikasaun ba uma sira ne’ebé  hetan estragu kauza dezastre naturál no hein orientasaun hosi Diretór Nasionál Risku Dezastre atu submete dadus hodi kontinua fó apoiu.

Iha fatin ketak, Xefe suku Dato-tolu, postu administrativu Fohorem, João Agostinho Resi, reforsa, vítima dezastre naturál iha suku ne’e hetan ona apoiu emerjénsia hosi Protesaun Sivil.

“Apoiu ne’ebé hetan hanesan ai-han no non ai-han hanesan terpal, materiál kozinña no seluk  tan, nokontinua materiál konstrusaun maibé sei iha prosesu,” João dehan.

Tuir dadus, iha suku Dato-tolu anin sobu uma hamutuk lima, ho kondisaun uma balun hetan estragu totál no balun kalen sobu, hanesan iha aldeia  Natardik, no Fatuk Kabuar Leten.

Vítima sira oras ne’e daudaun, balun provizóriu hela hamutuk ho família sira no balun iha fatin provizóriu ne’ebé seguru.

Jornalista : Celestina Teles

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here