DILI, 25 fevereiru 2022 (TATOLI)—Sekretáriu Jerál Cruz Vermella Timor-Leste (CVTL,sigla portugés), Luis Pedro Pinto, hateten voluntáriu hosi Rotary Youth Leadership Awards Timor-Leste (RYLA-TL) na’in-20 resin, halo doasaun raan atu apoia Banku Sangue Nasionál hodi atende ba pasiente dengue sira ne’ebé presiza raan.
“Ami hamutuk ho voluntáriu RYLA-TL ne’ebé durante ne’e ami halo nota entendimentu atu kontribui raan tanba ita-nia estoke raan daudaun ne’e menus hodi fó apoia ba pasiente sira liuliu kazu dengue,” Sekretáriu Jerál ne’e hateten bainhira halo doasaun raan iha edifisiu CVTL-bairru Formoza, sesta ne’e.
Iha biban hanesan, Tékniku Laboratóriu Banku Sangue Hopistál Nasionál Guido Valadares (HNGV), Virmina Imatuasi, hateten agardese ba ekipa CVTL no RYLA ne’ebé halo mobilizasaun voluntáriu halo doasaun raan atu apoia ba pasiente dengue.
“Ita-nia pasiente sira presiza raan, nune’e ita hetan suporta hosi voluntáriu sira liuliu raan mutin ne’ebé mak presiza liu ba kazu dengue, maibé hosi raan ne’ebé mak sira apoia ne’e ba moras hotu hanesan ema halo operasaun, maternidade no seluk tan,” nia akresenta.
Entretantu, Reprezentante RYLA-TL, Ivania do Santos Costa, dehan, ho voluntári halo doasaun raan atu apoia ba Banku Sangue HNGV hodi uza ba atende pasiente sira ne’ebé mak presiza raan.
Jornalista : Felicidade Ximenes
Editór : Florencio Miranda Ximenes