Komunidade nia uma hetan estragus kauza hosi anin halo ai-tohar iha suku Fatulia, Venilale, munisípiu Baucau. Imajen espesiál.

BAUCAU, 25 fevereiru 2022 (TATOLI) – Udan akompaña ho anin durante semana-ida estraga komunidade nia uma hamutuk 11 iha munisípiu Baucau.

Diretór Servisu Munisipál Protesaun Sivíl no Jestaun dezastre Baucau, Nelson Abílio Soares Nunes, fó-sai katak, kondisaun klima hamosu udan no anin-boot iha Baucau afeta ba komunidade iha postu admistrativu lima hanesan Venilale, Laga, Quelicai, Vemasse no Baucau vila.

“Ekipa ba halo ona intervensaun, ohin ita apoia ona emerjénsia ba sira,” Diretór Protesaun Sivíl no Jestaun Dezastre informa ba Agência Tatoli iha Vila Nova, sesta ne’e.

Uma sanulu resin-ida ne’e kompostu hosi postu Venilale hamutuk uma-lima, tanba ai- tohar kauza anin hanesan iha suku Fatulia rezulta uma-rua, suku Uailaha iha uma-rua no uma-ida iha suku Uma Ana Iku.

Iha postu administrativu Venilale, suku Fatulia iha família ida mak tenke evakua provizóriu ba sede suku tanba kondisaun uma la permite kauza hosi ai-tohar hanehan to’o estraga totál.

Hosi parrte postu administrativu Quelicai iha uma-tolu kauza hosi anin kompostu hosi suku Lakuliu iha uma-ida, Laisorlai-leten uma-ida no Laisorlai-kraik iha uma-ida.

Diretór Servisu Protesaun Sivíl no Jestaun Dezastre Naturál Baucau, Nelson Nunes. Imajen Tatoli/Natalino Belo.

Postu administrativu Laga ai-tohar uma-leten rezulta iha suku Atelari uma-ida, Vemasse iha suku Ossouala anin-boot rezulta uma-ida mak hetan estraga.

Enkuantu iha postu Baucau vila, suku Bucoli, aldeia Luliheni, uma-ida mak hetan estraga tanba ai-tohar monu hanehan no rezulta mós estrada nasionál diresaun Baucau-Dili nakfera kuaze metru-10. 

Parte protesaun sivíl no jestaun dezastre Baucau apoia ona ekipamentu emerjénsia ba vítima sira mak hanesan hahaan kompostu hosi foos, mina, supermie, ikan-lata, doxi no bee, no ekipamentu dapur kompostu baxia, balde inklui bikan no kanuru.

“Dadaun ne’e ekipa nafatin monitoriza situasaun tomak iha Baucau, karik informasaun ruma hosi autoridade lokál fó, ita direitamente halo intervensaun,” Nelson akresenta.

Nelson apela ba komunidade iha Baucau atu kontinua informa liuhosi autoridade lokál bainhira hasoru dezastre naturál nune’e buka meiu hadok aan hosi fatin risku hanesan rai-lolon, ai-hun no mota nune’e bele prevene-aan antes mosu akontesimentu dezastre.

Jornalista    : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here