iklan

NASIONÁL, HEADLINE, INKLUZAUN SOSIÁL

TIC Timor I.P fasilita servisu SEII iha área teknolojia no komunikasaun

TIC Timor I.P fasilita servisu SEII iha área teknolojia no komunikasaun

Sekretária Estadu Igualidade no Inkluzaun, Maria José da Fonseca Monteiro de Jesus no Diretór Ezekutivu TIC Timor, I.P, Roberto Caetano de Sousa Vicente, asina akordu iha área teknolojia no komunikasaun iha Gabinete SEII, Caicoli, sesta (25/02). Imajen TATOLI/Arminda Fonseca

DILI, 25 fevereiru 2022 (TATOLI)— Agência de Tecnológia da Informação Comunicação Timor-Leste, Institutu Públiku (TIC Timor, I.P), sesta ne’e, asina nota entendimentu ho Sekretaria Estadu ba Igualidade no Inkluzaun (SEII) iha área teknolojia no komunikasaun.

Iha biban ne’e, Sekretária Estadu Igualidade no Inkluzaun, Maria José da Fonseca Monteiro de Jesus, hateten, akordu ne’ebé parte rua halo ho hanoin atu hakat ba Governu eletróniku.

“Ba oin koko atu halo konetividade ba atividade entre intituisaun, Governu Sentrál, no munisípiu sira atu hafasil servisu,” Sekretária Estadu hateten ba Agência TATOLI, iha ninia knaar fatin, Caicoli.

Notísia relevante: TIC Timor kapasita pesoál informátika hosi instituisaun Estadu 16

Liuhosi teknolojia no komunikasaun ne’ebé TIC Timor, I.P apoiu ba SEII, bele fasilita liután komunikasaun.

“Ha’u fiar liuhosi apoiu ne’e, bele ajuda ami hahú hosi nasionál to’o baze, liuliu fasilita ami-nia pontu fokál sira iha munisípiu no postu administrativu sira halo komunikasaun, hafasil asesu informasaun no serbisu sira ne’ebé sei halo ba oin,” nia tenik.

Iha fatin hanesan, Diretór Ezekutivu TIC Timor, I.P, Roberto Caetano de Sousa Vicente, dehan, akordu ne’e foku ba apoiu prinsipál rua hanesan mellora liután servisu konetividade internál iha edifísiu SEII to’o ba munisípiu sira no estabelesimentu servisu báziku hanesan kriasaun website.

“Sira ne’e hanesan faze dahuluk, karik tuir mai ita haree fali ba sira-nia baze dadus, liuliu iha servisu inkluzasaun sosiál, oinsá ami buka dalan apoiu SEII atu presta servisu di’ak liután,” nia dehan.

Hafoin asina akordu, servisu hotu prontu implementa, tanba ne’e TIC Timor hahú aban sei entrega sasán sira ba SEII atubele utiliza.

“Antes ne’e, ami apoiu ona institusaun hamutuk 46, ne’ebé ita fornese servisu oinoin hanesan email, website, dezenvolve aplikasaun, formasaun rekursu umanu no seluk tan,” nia tenik.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!