Sekretária Estadu Igualdade no Inkluzaun (SEII), Maria José da Fonseca Monteiro de Jesus. Imajen TATOLI/Francisco Sony

DILI, 25 fevereiru 2022 (TATOLI)—Sekretaria Estadu ba Igualdade no Inkluzaun (SEII) hamutuk ho OXFAM internasionál iha Timor-Leste, sesta ne’e, asina nota entendimentu ba projetu Hakbiit iha área empoderamentu feto no igualidade jéneru ba tinan 2022 to’o 2025.

Biban ne’e, Sekretária Estadu ba Igualidade no Inkluzaun, Maria José da Fonseca Monteiro de Jesus, hateten, objetivu parte rua asina nota entendimentu, atu hametin kooperasaun hodi promove igualdade jéneru no inkluzaun sosiál, liuhosi projetu Hakbiit ne’ebé aliña tuir Timor-Leste nia Planu Dezenvolvimentu Estratéjiku 2011-2030, Deklarasaun Maubisse 2012-2023 no Planu Estratejia 2018-2023 hosi SEII.

“Importante kooperasaun ne’e bele reforsa implementasaun programa Hakbiit iha munisípiu sira, bele ajuda transforma relasaun no hakbiit feto, inklui feto ho defisiénsia sira hodi partisipa ativamente iha sosiedade ekonomia no polítika, hodi bele hetan esperiénsia boot liu ba direitu no oportunidade ekonómiku sira,” governante ne’e hateten ba Agência TATOLI, iha Caicoli.

Notísia relevante: Programa empoderamentu ekonómia feto implementa iha suku 150

SEII nu’udár entidade prinsipál Governu, ne’ebé iha responsabilidade atu reforsa kompromisu ezekutivu bazeia ba implementasaun abordajen multisetoriál, ne’ebé dezenvolve ona tuir kompromisu iha Planu Estartéjiku Dezenvolvimentu Nasionál ho objetivu internasionál sira ne’ebé Timor-Leste hola parte nu’udar membru.

Nota entendimentu ne’e sei fó apoiu tékniku ba OXFAM iha munisípiu sira ne’ebé implementa programa.

Iha fatin hanesan, Diretór OXFAM iha Timor-Leste, Fausto Belo Ximenes, hateten, akordu ne’e foku liu ba área Rai Osan ba Mudansa (ROMANSA) no atividade seluk hanesan Empodera Grupu Feto sira iha atividade negósiu kiik sira.

Nune’e, OXFAM koordena malu ho SEII hodi haforsa grupu sira hodi bele rai osan no fó apoiu ideia ba sira hodi bele benefisia an no família.

“Kona-ba ROMANSA ne’e, ita serbisu hamutuk ho grupu feto sira iha komunidade atu tuur hamutuk hodi bele rai sira-nia osan, nune’e benefisia grupu no família, ne’ebé aliña mós ba SEII nia atividade kona-ba Rai Osan ba Mudansa,” nia esplika.

Aleinde ne’e, atividade xave seluk ne’ebé OXFAM atu hala’o liuhosi nota entendimentu ne’e mak serbisu hamutuk ho grupu feto sira no komunidade jerál, atu inkluensia transformasaun sosiál liuhosi presepsaun ba kapasidade feto no feto iha lideransa, nune’e haforsa ho feto defisiénsia nia lian iha vida polítika no ekonomia.

“Tuir ita-nia planu liuhosi nota ne’ebé asina, ita hala’o atividade durante tinan-lima, ho alvu hetan partisipante hamutuk 59.000, maibé daudaun programa foin hahú iha tinan 2020, maibé mosu tan situasaun COVID-19 kuaze impata buat barak, maibé inísiu to’o agora konsege ona hetan partisipante hamutuk 2.000,” nia tenik.

Daudaun programa ne’e realiza ona iha munisípiu haat hanesan  Dili, Rejiaun Administrativa Espesiál Oé-cusse Ambeno (RAEOA) no Liquiçá, ne’ebé tuir planu iha posibilidade halo extensaun ba munisípiu Manatuto.

Programa ne’e hetan partisipasaun di’ak tebes, hahú hosi nível nasionál to’o iha baze.

Entendimentu ne’ebé ohin parte rua asina, sei implementa hahú iha loron 25 fevereiru 2022 to’o 30 juñu 2025.

Programa Habiit hetan apoiu finansiamentu hosi Governu Austrália, liuhosi programa ONG Austrália (ANCP) ho totál orsamentu millaun $2,7.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here