Sentru viveru ne'ebé Autoridade RAEOA konstrui iha aldeia Tumin, suku Bobometo, Sub-rejiaun Oésilo, konklui ona. Imajen mídia Sekretaria Rejionál Agrikultura.

OÉ-CUSSE, 25 fevereiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), prioritiza floresta hodi konstrui sentru viveru unidade rua iha sub-rejiaun Oésilo no Nítibe atu hasa’e kualidade debitu bee liuhosi kultivasaun ai-oan ba bee-matan sira.

“Objetivu prinsipál harii sentru viveru atu aumenta númeru plantasaun ai-oan, tanba iha 2020-2021 Oé-Cusse enfrenta krize bee-moos, ne’ebé afeta ba ema animál no plantasaun, entaun autoridade liuhosi Sekretaria Rejionál Agrikultura, tau planu prioridade ba floresta, nune’e bele kuda ai barak iha área ne’ebé risku ba bee-matan sira, atu hasa’e kualidade debitu bee-matan sira, hodi sustenta iha tempu bailoron,” Sekretáriu Rejionál ba Asuntu Agrikultura, José Eta, informa ba Agência Tatoli iha Oé-Cusse, sesta ne’e.

Objetivu seluk harii sentru viveru iha baze, nu’udar polítika hafasil partisipasaun komunidade iha prosesu ne’e, tanba área Oé-Cusse sempre difikulta movimentu transporte atu transporta ai-oan ba komunidade iha baze, liuliu iha tempu udan atu halo kultivasaun.

Tán ne’e iha tinan kotuk autoridade RAEOA konstrui sentru viveru rua, iha sub-rejiaun Oésilo, agora konklui ona, iha sub-rejiaun Nítibe nia progresu fíziku atinje 20%, ho sira-nia medida metru 20×40, kapasidade bele akumula ai-oan rihun 20.

“iha Oésilo responde agrikultór sira hosi suku Usitasa’e, Bobometo, Usitaqueno, iha Nítibe sei responde suku lima, Lela-Ufe, Suni-Ufe, Uistaco, Bene-Ufe no Ban-Afi, tuir planu 2022 ne’e autoridade sei konstrui tán sentru viveru iha sub-rejiaun Nítibe parte tasi-ibun no sub-rejiaun Pásabe nune’e responde ba suku Abani no Malelat,” nia katak.

Sentru viveru iha RAEOA daudaun ne’e iha tolu, ida iha diresaun rejionál agrikultura, ida iha sub-rejiaun Oésilo no ida iha sub-rejiaun Nítibe.

Entretantu, sentru viveru iha sub-rejiaun Oésilo konstrui iha suku Bobometo, aldeia Tumin, ezekuta hosi empreza Malbobos Unipesoál, Lda, ho valór kontratu $73,476,04, no iha sub-rejiaun Nítibe konstrui iha suku Lela-Ufe ezekuta hosi empreza Kloenifu Unipesoál, Lda, ho valór kontratu $73-resin, ne’ebé aloka hosi Orsamentu Jerál Estadu (OJE) 2021.

Xefe Lela-Ufe hosi sub-rejiaun Nítibe, José Neno Sila, hatete, sentru viveru ne’ebé konstrui importante tebes no espera bainhira obra ne’e konklui nia funsionamentu ba to’o duni komunidade iha perténsia Nítibe.

“Sentru ne’e harii iha ha’u-nia suku, aldeia Mahata, ida-ne’e foin dahuluk autoridade estabelese iha zona Nítibe. Kuandu projetu ne’e remata bele tau ona ai-oan nune’e bele distribui ba komunidade iha Nítibe atu kuda iha bee-matan sira,” nia katak

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here