Xefe governu, Taur Matan Ruak ra’ut hela fo’er sira ne’ebé halibur hamutuk durante limpeza. Foto TATOLI: António Gonçalves

DILI, 25 fevereiru 2022 (TATOLI)-Primeiru-Ministru Taur Matan Ruak, apela ba sidadaun hotu-hotu atu halo limpeza hodi hamoos fo’er sira iha uma hun, so’e fo’er iha fatin lixu nune’e bele halo prevensaun ba moras dengue iha rai-laran.

“Hamos ambiente  uma hanesan vazu aifunan, roda aat, bee nalihun ne’e ita kuidadu hodi halo prevensaun  ba moras dengue,” Taur Matan Ruak hateten ba jornalista sira hafoin remata enkontru ho Prezidente Repúblika iha Palásiu Prezidensiál, Bairu-Pité Dili, sesta ne’e.

Taur dehan, iha enkontru ne’e,  Xefe Estadu mós preokupa kona-ba kazu moras dengue ne’ebé hamate ona ema na’in 32. Aleinde ne’e preokupa kona-ba kazu COVID-19.

“Nune’e husu Governu atu kontinua foti asaun sira inklui presiza partisipasaun komunidade atu tau importánsia mós ba limpeza hodi  bele oinsá kombate,” Ezekutivu hateten.

Ho preokupasaun hirak ne’e maka tuir PM Taur Matan Ruak katak Ministériu Saúde sei halo esforsu atu oinsá redúz númeru moras dengue ho COVID-19 iha Timor-Leste.

Iha parte seluk, iha enkontru ne’e, lidér na’in rua ne’e, diskute mós kona-ba kestaun seguransa durante prosesu kampaña to’o eleisaun prezidensiál ne’ebé sei hala’o iha loron 19 fulan-marsu 2022.

“Hau fó garantia ba Prezidente Repúblika kona-ba seguransa  ba prosesu kampaña to’o ba iha loron eleisaun. Tanba  Governu empeñadu loos hodi kria kondisaun hotu seguransa, tékniku no lojístiku nune’e eleisaun prezidensiál bele lao di’ak tuir regra ne’ebé iha no esperensia sira liubá,” Nia hateten

Kona-ba dezastre  naturál, Xefe Governu informa durante semana ida ne’e,  akontese udan bo’ot hodi hamosu inundasaun, maibé Governu foti ona asaun hodi evakua ba fatin seguru.

Entretantu, tuir dadus husi Ministériu Saúde relata to’o loron 24 fulan-fevereiru ne’e rejista kazu dengue hamutuk 2.427, mate ema na’in 32.

Kazu ne’e maioria deteta husi Munisípiu Dili ho total 1.524 kazu, Munisípiu Manatuto ho kazu 149, Baucau ho kazu 105, Lautem ho kazu 100, Munisípiu Manufahi kazu 98, Munisípi Ermera ho kazu 90, Munisípi Covalima ho kazu 90.

Munisípi Liquiça kazu 82, Munisípiu Aileu ho kazu 69, Munisípiu Viqueque 53, Munisípiu Bobonaro ho kazu 32, Ainaro ho kazu 32 no RAEOA ho kazu 3.

Jornalista: Nelson de Sousa

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here