Komandante PNTL Baucau, Sekretáriu jerál CMCLN, Diretór CNE no ekipa susesu PR foto hamutuk iha kuartél PNTL Baucau, sesta (25/02). Imajen Tatoli/Natalino Belo.

BAUCAU, 25 fevereiru 2022 (TATOLI) – Polísia Nasionál Timor-Leste munisípiu Baucau, hala’o reuniaun hodi realiza paktu seguransa entre ekipa susesu kandidatu Prezidente Repúblika (PR) nune’e kria pás no establidade durante períodu kampaña to’o anunsia rezultadu finál eleisaun prezidensiál.

Komandate PNTL Baucau, Superintendente Xefe António de Sá, hateten, enkontru entre ho ekipa susesu kandidatu Prezidente Repúblika ne’ebé eziste iha Baucau rezulta akordu paktu seguransa ne’ebé sei asina nune’e garante pás no establidade durante períodu kampaña to’o eleisaun prezidensiál iha Baucau.

“Ita iha akordu kona-ba asina paktu seguransa, rezultadu hosi paktu ne’e sai hanesan baze atu konsolida, esplika ba komunidade sira atu garante pás no establidade iha Baucau,” Komandante PNTL Baucau hateten iha Vila Nova, sesta ne’e.

Objetivu hosi paktu ne’e atu asegura seguransa durante períodu prosesu tomak hahú hosi kampaña, elesaun to’o rezultadu finál.

António de Sá urgullu ho kontribusaun hosi ekipa susesu kandidatu sira hosi Baucau nian tanba partisipa másimu no fó ideia inklui prontu kolabora, koordena no komunika ba malu hodi garante seguransa durante prosesu tomak iha Baucau.

Solusaun rua mak deside hamutuk hanesan kontrola simpatizante no militante kada kandidatura liuhosi mekanismu internalmente no mantein liña koordenasaun ho parte PNTL no FALINTIL-FDTL.

“Ita apela ba komunidade hotu-hotu iha devér obrigasaun ida hanesan Baucau-oan fó kontribusaun ba pás no estabilidade durante realiza festa demokrasia,” António akresenta.

Reprezentante ekipa susesu kandidatura Prezidente Repúblika Francisco Guterres ‘Lu Olo’ atuál Vise Koordenadór Partidu FRETILIN Baucau, Ana da Conçeicão, prontu apoia seguransa hodi pás no estabilidade iha Baucau.

“Ami sempre konvoka reiuniaun hodi fó atensaun ba militante sira atu mantein pás no estabilidade,” Ana hateten.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here