PNTL RAEOA prátika simulasaun asegura eleisaun prezidensiál. Imajen Tatoli/Abílio Elo Nini.

OÉ-CUSSE, 25 fevereiru 2022 (TATOLI) – Polísia Nasionál Timor-Leste (PNTL) iha Rejiaun Administrativa Espesiál Oé-Cusse Ambeno (RAEOA), sesta ne’e ensera atrasaun simulasaun ba manutensaun orden públiku Treinamentu Operasaun Seguru (TOS) ba membru efetivu sira hodi asegura kampaña no eleisaun prezidensiál períodu 2022-2027.

Prátika simulasaun ne’e realiza durante loron tolu hahú iha kuarta to’o sesta, 25 fevereiru ne’e ho matéria prinisipál iha prátika ne’e, simulasaun Manutensaun Orden Públiku (MOP) no Treinamentu Operasaun Seguru (TOS).

Komandante PNTL RAEOA, Superintendente xefe Mateus Mendes Assunção, hatete, objetivu prátika nu’udar preparasaun atubele asegura festa demokrasia ne’e ho susesu.

“Simulasaun ne’e importante, tanba ita hanesan ajente seguransa, iha situasaun balu presiza ita-nia intervensaun, intervensaun ne’e ita tenke preparadu, tán ne’e preparasaun ohin ami asiste hatudu duni rezultadu, maibé hanesan komadante distritu, ha’u husu nafatin ita-boot sira-nia pasiénsia iha situasaun tomak, tanba imi-nia prezensa ne’e hasoru masa ne’ebé la fasíl, maibé ita tenke preparadu atu hasoru,” Komandante PNTL RAEOA, Superintendente Xefe Mateus Mendes Assunção, ko’alia iha seremónia enseramentu ne’e.

Nune’e nia apela nafatin ba membru sira bainhira hala’o atividade seguransa iha sentru votasaun no estasaun votasaun sira presiza nafatin disiplina, hatudu profisionál hodi serbisu hamutuk hamutuk ho orgaun administrasaun eleitorál CNE no STAE, nune’e festa demokrasia ne’ebé realiza iha Oé-Cusse la’o ho pás no estabilidade.

Dirijente PNTL RAEOA ne’e fó-sai katak, prátika atrasaun atu uza forsa hasoru masa bainhira suspeitu ka sidadaun ruma ataka PNTL iha eventu ruma.

Dadus komandu PNTL RAEOA daudaun ne’e prepara ona membru efetivu na’in-137, maibé la sufisiente atu kobre sentru votasaun 60 no estasaun votasaun 88, nune’e komandu husu apoia iha Polísia Unidade Fronteira (UPF) na’in-35, totál hamutuk membru efetivu na’in-172 preparadu ona atu asegura kampañia no eleisaun prezidensiál ba períodu 2022-2027 iha rejiaun ne’e.

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here