Bispu Dioseze Maliana, Dom Norberto do Amaral. Imajen TATOLI/António Gonçalves.

BOBONARO, 25 fevereiru 2022 (TATOLI) – Bispu Dioseze Maliana, Don Norberto do Amaral, husu kandidatu Prezidente Repúblika na’in-16 atu evita hasai liafuan insulta malu iha kampaña eleitorál ne’ebé tuir kalendáriu sei realiza iha loron 02 fulan-marsu tinan 2022.

“Ha’u-nia mensajen ba kandidatu sira hotu katak atu hato’o sira-nia planu ho hanesan ema-ne’ebé matenek, ema-ne’ebé iha morál tuir ema-ne’ebé iha kakutak, haree buat hotu nu’udar ema dame-na’in, ne’ebé husu ba sira evita hasai liafuan insulta malu no liafuan sira-ne’ebé hamanas sosiedade nia fuan,” Bispu Dioseze Maliana hato’o mensajen ne’e iha Kámara Ekledistika, Koléjiu Maliana, sesta ne’e.

Importante liu iha kampaña eleitorál mak aprezenta vizaun, misaun, programa no estratéjia politika, nune’e povu mak haree no tetu didi’ak hodi deside sira-nia an atu fo votu iha eleisaun nune’e bele sai Prezidente Repúblika ne’ebé di’ak ba povu Timor-Leste tomak.

“Ita tenke hatuur ita-nia aan tuir lala’ok demokrasia ne’ebé haruka ita atubele hala’o didi’ak ita-nia moris iha nasaun ne’e, tuir regra  no ita-nia konstituisaun haruka. Ne’ebé, ha’u husu ba povu atu tetu didi’ak no hili tuir konsiénsia, labele haree de’it ba nia emosaun ko’alia, no hare de’it ita-nia partidu, maibe haree ba ema-ne’ebé tebes ka nia soi  duni atu lori Timor ne’e ba oin,” Bispu ne’e fó hanoin.

Ikusliu, Bispu Dioseze Maliana ne’e husu ba juventude sira iha territóriu laran tomak  fó liman ba malu atubele tau aas sentidu nasionalizmu no patriotizmu iha fuan, hodi kontribui ba pás no establidade, hahú hosi períodu kampaña eleitorál to’o faze apuramentu.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here