Ekipa sira evakua/mate isin iha Mota raiketan/imajen espesial//

COVALIMA, 25 Fevereiru 2022 (TATOLI) – Ekipa Komisaun Risku Dezastre Naturál Covalima (KRDN), hetan mate isin ida maizumenus 17:00 horseik loro-koraik iha mota Raiketan, lokaliza iha Suku Belekasak, Postu Administrativu Maucatar, Munisípiu Covalima.

Koordenadór Protesaun Sivil, Munisípiu Covalima, Dinis Perreira, konta katak matebian ho naran kompletu Lucia Cunha, mai hosi Munisípiu Covalima ho objetivu  atu faan bua ho malus no  nia oan mane Paulo Mendes atu foti nia diploma.

“Matebian nia oan kontaktu ba Asaun Sosial hafoin informa mai ha’u ho ekipa protesaun sivíl ba iha tereñu evakua nia oan mane sai hosi  mota laran no mate isin ami entrega ba nia família, iha Suku Camana”, salienta.

Hafoin ekipa  Komisaun Risku Dezastre Naturál Covalima, hetan mate isin entrega ba matebian nia família no transporta keda mate isin ba Munisípiu  Bobonaro, Postu Administrativu Lolotoe, Suku  Opa Aldeia Mape hodi halo prosesu funébre.

Tuir kronolojia matebian ho nia oan mane bo’ot lao ain sai husi nia rezidénsia iha aldeia Mape tuku 10 dader ho obejtivu atu baa faan bua, malus no Kafe iha parte merkadu Suai Villa ninian, hafoin to’o dalan klaran akontese udan makas halo rai nakukun, maibe iha momentu ne’e matebian ne’e nafatin hakarak ba duni fatin destinasaun.

Tamba matebian mós hanesan membru ida Micro kreditu Moris Rasik nian, kada semana depozita dala ida, entaun ohin data fiksu atu entrega osan ba banku, nune’e ho obrigatóriu inan ho oan ne’e tama duni ba mota laran, maibe hafoin to’o mota klaran volume bee makas halo sira na’in rua atu hakat ba oin no kotuk mós la diak ona, ikus mai bee baku feto ne’e monu no lori lakon tia, maibe ninia oan mane konsege salva aan husi korente mota refere.

Hafoin hare inan kous ne’e mota lori mout lakon ona, oan mane ne’e ho ain liman nakdedar hamrik iha mota ninin hasai nia telemovel koktatu hodi hato’o novidade ne’e ho tanis makas ba nia família katak korenta mota baku monu nia inan.

“Distánsia husi ami nia ne’e atu ba mota kuaze kilo-tolu hanesan ne’e, entaun ami iha ne’e mós telefoni kedas ba polisia sira iha Suai mak ho komunidade sira ba buka lesuk, ikus mai hetan nia iha loraik ne’e ho kondisaun mate ona”, konklui Xafe aldeia Mape, Paulino Barros informa ba jornalista Tatoli, liuhusi via-telefone.

Jornalista : Selestina/Sergio da Cruz

Editor : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here