APFTL realiza asembleia jerál Iha CNE, sesta, 25-2-2022. Imajen TATOLI/Nelia Fernandes

DILI, 25 fevereiru 2022 (TATOLI)-Alumni Parlamentu Foinsa’e Timor-Leste (APFTL), sesta ne’e realiza asembleia jerál, ho objetivu garante transparénsia iha organizasaun ne’e rasik.

“Objetivu hosi asembleia jerál ne’e forum ida ne’ebé hatudu ninia transparénsia iha instituisaun no organizasaun ida, hanesan estatutu no rejimentu prosedimentu internál iha organizasaun, ami tenke hakruk”, Prezidente APFTL, Zaulino Gomes da Silva, ba jornalista sira iha Salaun Komisaun Nasionál Eleisaun (CNE, sigla portugés).

Nia dehan forum ne’e tenke nakloke ba membru hotu. Katak, organizasaun tinan ne’e hetan osan hira no gasta ba saida, ida ne’e tenke relata ho intensaun ida atu hatudu prátika transparénsia iha organizasaun.

Nia esplika, tinan ne’e APFTL tau impórtansia ba programa prioridade lima no atividade 38.

“Hosi programa lima ne’e, haat foka ba esternál no ida foka ba internál”, nia katak.

Programa lima ne’e APFTL nafatin foka ba dezenvolve koñesimentu juventude iha moris saudável, kontinua dezenvolve joven ba hahalok síviku, ne’ebé liga ba formasaun edukasaun sívika ba joven sira, liuliu iha eleisaun agora.

“Ami foka oinsá halo kampaña ba joven sira iha hahalok síviku atu kontribui ba eleisaun ne’e ho hakmatek no pás iha ámbitu eleisaun”, nia afirma.

Programa seluk, APFTL nafatin kontinua dezenvolve joven sira-nia talentu, kreatividade, nune’e mós kontinua dezenvolve joven sira-nia análiza krítiku ba problema sosiál, liuliu foku ba estudu sira.

“Hanesan, ami halo peskiza no survey, liuliu ba problema sosiál. Nune’e, iha programa lima ne’e mak ami kontinua fortifika liuhosi dezenvolvimentu kapasidade institusionál, dezenvolve membru sira-nia kapasidade oinsá sira iha skill atu organiza eventu no iha skill atu hakerek proposta, survey no halo estudu sira”, nia afirma.

Hosi programa lima ne’e, APFTL prevee orsamentu pur-volta rihun $300 resin.“ Maibé, orsamentu ida ne’e seidauk iha, agora ami prevee hela, servisu mak buka hosi Governu, ajénsia sira no kontribuisaun hosi membru”, nia esplika.

Tuir dadus hosi Prezidente APFTL, dadaun ne’e membru hamutuk 300-resin ne’ebé kompostu hosi nível postu iha munisípiu hotu.

Jornalista : Nelia Fernandes

Editora     : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here