iklan

EDUKASAUN, HEADLINE

UNTL realiza semináriu ho intensaun halibur líder istóriku

UNTL realiza semináriu ho intensaun halibur líder istóriku

Reitór UNTL, João Soares Martins. Imajen TATOLI/Francisco Sony

DILI, 24 fevereiru 2022 (TATOLI)–Universidade Nasionál Timor-Lorosa’e (UNTL) tenta halibur líder istóriku atu ko’alia ba malu iha semináriu  nasionál ho tema ‘reflesaun nasionál ho espíritu rekonsiliasaun konstroi no konsolida Estadu RDTL’, maibé líder importante sira la konsege marka prezensa.

Reitór UNTL, João Soares Martins, dehan, molok atu hakat ba Eleisaun Prezidensiál ho situasaun pás, parte universidade iha inisiativa halibur líder istóriku sira.

“Ami tenta atu lori líder sira mai hotu, maibé la mai. Sira ne’ebé mak mai ami agradese tebes. Ami haree de’it maun boot sira-nia oin ami kontente ona, maibé ami kontente liu tan kuandu ami haree sira ko’alia ba malu,” Reitór universidade hateten iha salaun kampus Hera, kinta ne’e.

Notísia relevante: UNTL garante fasilidade sufisiente simu estudante 4.100

Akadémiku ne’e konsidera, bainhira líder sira tuur hamutuk no ko’alia ba malu ona maka bele garante ona ambiente trankuilu hodi dezenvolve rai ida-ne’e ho di’ak.

“Ema hotu la presiza tan ona preokupa ho sira-nia la ko’alia ba malu ne’e,” nia akresenta.

Líder importante sira ne’ebé maka UNTL tenta konvida iha semináriu nasionál ne’e maka Kay Rala Xanana Gusmão, Marí Alkatiri, José Ramos Horta, Rogerio Lobato no José Luís Guterres.

Enkuantu, José Ramos Horta posibilidade fó ninia palestra no seluk hato’o de’it mensajen hanesan Xanana Gusmão.

“Ita-nia Maun Xanana laiha tempu marka prezensa tanba preokupa ho preparasaun kampaña, maibé nia dezeju tebes atu semináriu ne’e bele la’o ho di’ak atu halibur ideia di’ak, nune’e bele fanu ema hotu atu serbisu hamutuk iha estabilidade pás no trankuilu atubele dezenvolve rai ida ne’e di’ak liután,” nia tenik.

Jornalista : Tomé Amado

Editora     : Julia Chatarina

iklan
iklan

Leave a Reply

iklan
error: Content is protected !!