Prezidente Repúblika, Francisco Guterres Lú Olo. Imajen Tatoli/Egas Cristovão

DILI, 24 fevereiru 2022 (TATOLI)-Prezidente Repúblika, Francisco Guterres Lú Olo, husu ba Timoroan hotu liu-liu lidér sira atu halakon egoista privadu, hodi servisu hamutuk  nune’e bele hadia povu nia moris di’ak.

Lú Olo, hato’o pedidu ne’e bainhira halo abertura ba seminariu nasionál ho tema “Reflesaun Nasionál ho Espíritu Rekonsiliasaun, Konstrui no Konsolida Estadu RDTL’’ ne’ebé organiza hosi UNTL ho Forum Komunikasaun ba Valór Nasaun(F-KOVANA), iha kampus UNTL Hera, kinta ne’e.

“Lidér polítiku ho ukun-na’in sira no ita hotu nu’udar sidadaun iha devér atu tau esforsu hamutuk tau sees ita-nia ego hodi buka solusaun ba problema boot sira ne’ebé povu hasoru,”Xefe Estadu hateten.

Nia dehan durante tinan rua ona povu no Estadu Timor-Leste enfrenta problema mundiál COVID-19 no dezastre naturál iha loron 4 fulan-abríl 2020 ne’ebé fó impaktu ba prosesu dezenvolvimentu, maibé nia apresia ba Timoroan hotu-hotu ninia espíritu solidaridade, domin, kontribuisaun no servisu hamutuk hodi ultrapasa situasaun defisil ne’e.

Atu hadia povu nia moris di’ak, tuir nia Timoroan hotu tenke buka atu haburas unidade nasionál, promove dialogu, rona malu no simu malu hodi serbí povu Timor-Leste.

“Laiha problema ida mak laiha solusaun bainhira ita fó atensaun ba nesesidade hosi sira-ne’ebé maka presiza liu no hatene halo parseria bazeia ba diálogu no respeitu ba malu,”Lú Olo hateten.

Ba futuru, nia sujere atu jerasaun foun sira tenke hametin liután unidade, buka envolve an iha prosesu hotu ne’ebé liga ho dezenvolvimentu Timor-Leste nian, nune’e bele afirma nafatin TL nu’udar nasaun ida livre, soberanu no independente.

Jornalista: Nelson de Sousa

Editór: Agapito da Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here