Embaixadór Indonezia ba Timor-Leste, Okto Dorinos Manik,entrega karta kredensiál ba Prezidente Repúblika Francisco Guterre Lú-Olo.Imajen/ Média PR

DILI, 24 fevereiru 2022 (TATOLI)— Sekretáriu Estadu Juventude no Desportu (SEJD), Abrão Nokosiku, kinta ne’e, hasoru malu ho Embaixadór Indonezia ba Timor-Leste, Okto Dorinos Manik hodi diskute akordu kooperasaun entre nasaun rua iha área desportu no juventude.

“Ita ho Embaixadór Indonézia hasoru malu hodi ko’alia fila-fali kooperasaun sira ne’ebé antes ne’e SEJD halo ona ho Governu Indonézia ne’ebé daudaun invalidu ona iha tinan kotuk tanba kooperasaun ba tinan lima de’it, entaun ita atu halo moris fila-fali kooperasaun sira ne’e liu-liu iha área desportu no juventude nian,” Sekretáriu Estadu ne’e afirma hafoin ramata sorumutuk ho Embaixadór ne’e iha edífisiu SEJD-Lecidere, kinta ne’e.

Iha akordu kooperasaun ne’e foku ba área juventude nian ne’ebé atu partilla informasaun ba malu entre nasaun rua iha área empreendedorizmu no programa sentru juveníl tanba Indonézia nasaun ida ne’ebé susesu tebes iha área sira ne’e.

Enkuantu, iha área desportu, parte Indonézia prontu apoia  modalidade hirak ne’ebé mak Timor-Leste presiza hetan asisténsia atubele mellora di’ak liután desportu iha Timor-Leste.

“Ita presiza servisu hamutuk, ezemplu Indonézia di’ak liu iha Badminton, entaun ita servisu hamutuk atu bele lori treinadór sira iha ne’ebá mai fó treinu ba ita nia atleta sira, la’ós ne’e de’it iha modalidade hotu ne’ebé ita presiza,” nia esplika.

Iha fatin hanesan, Embaixadór Indonézia ba Timor-Leste, Okto Dorinos Manik,  akordu kooperasaun hirak ne’e hanesan kompromisu Govenru Indonézia atu apoia Timor-Leste iha área desportu no juvnetude nian.

“Akordu kooperasaun ne’e kle’ur ona ita presiza renova fali tanba ita haree iha tinan sira ba kotuk akordu ne’e sei moris ne’ebé jogu hala’o iha fronterira sira di’ak loos, hanesan liga fronteira jogu oi-oin ne’ebé mak nasaun rua halo iha fronteira, ne’ebé akordu ne’e renova fali jogu sira ne’e bele hala’o fali,” nia dehan

Nune’e, Indonézia prontu apoia Timor-Leste iha modalidade hotu ne’ebé presiza tanba modalidade Taekwondo no futeból susesu tebes.

“Ha’u haree Taekwondo no futeból Timor-Leste susesu uitoan ona, tanba iha jogu Sea Games Taekwondo komesa hetan ona medalla ne’e susesu, futeból iha AFF nian agora to’o ona ba semi finál ida ne’e susesu ida tenke dezenvolve nafatin,” nia dehan.

Jornalista: Hortencio Sanchez

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here