Komisária Komisaun Nasionál Diretu Labarik, Dinorah Granadeiro. Imajen TATOLI/Francisco Sony

DILI, 24 fevereiru 2022 (TATOLI) — Prezidente Institutu Defesa ba Direitu Labarik nian (IDDL-sigla portugés), Dinorah Granadeiro, husu ba kandidatu Prezidente Repúblika (PR) no partidu polítiku sira atu asegura no proteje labarik sira durante loron kampaña.

“Ami Institutu Defeza Direitu Labarik hamutuk ho parseiru hotu ne’ebé servisu ba direitu no protesaun ba labarik, husu ba kandidatu, partidu polítiku no entidade sira hotu atu asegura no fó protesaun ba labarik husi risku sira durante periódu kampaña eleisaun”, Dinorah ba jornalista sira, iha salaun Ministériu Solidaridade Sosiál no Inkluzaun (MSSI), Caicoli, ohin.

Nia adianta, kandidatu PR no partidu polítiku presiza buka no asegura prosesu atividade kampaña eleitorál atu la’o labele hamosu violénsia no evita risku ba foinsa’e sira liuliu envolvimentu labarik minoridade sira.

Alende ne’e, nia hato’o mós ba parte seguransa liuliu Polísia Nasionál Timor-Leste (PNTL) hodi kria mekanizmu atu labele husik labarik tama iha área kampaña polítika nian no halo kamunikasaun ho baze hodi informa komunidade lokál kona-ba bandu partisipasaun labarik.

“Ho ida-ne’e ita husu ba labarik sira tenke kuidadu-an no labele partisipa iha kampaña durante aprendizajen sei la´o”, tenik.

Nia esplika tan, protesaun, prevensaun, asegura no motiva labarik la’ós de’it IDDL ka parseiru maibé inan-aman inklui manorin sira atu tau matan no hatudu disiplina no mós kontinua hala’o prosesu aprendizajen.

Tanba durante periódu kampaña kandidatu sira no partidu polítiku hotu hahú husi eleisaun jerál 2001 to’o eleisaun jerál 2007, 2012, 2017 no 2022 envolvimentu labarik kontinua aas, entaun fenomena ida-ne’e tenke haree hanesan situasaun importante tanba kampaña hosi kandidatu no partidu polítiku nian mak úniku festa demokrásia iha ne’ebé akontese mobilizasaun massa barak.

Organizasaun naun-governmentál sira-ne’ebé servisu ba monitorizasaun ba eleisaun sira liubá halo dokumentasaun no relata katak labarik barak mak envolve iha kampaña balun abandona eskola hodi ba tuir kampaña. Entaun ho konkluzasaun katak envolvimentu labarik nian iha kampaña sei kontinua sai vítima durante períodu kampaña.

“Tanba menus koñesementu públiku kona-ba direitu labarik nia partisipasaun polítiku, no menus konsiénsia eleitorál kona-ba atitude demokrátiku sei nafatin sai hanesan impedimentu ba prosesu harii pás no estabilidade durante periódu eleisaun”, konklui.

Jornalista : Osória Marques

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here