Prezidente Repúblika, Francisco Guterres Lú Olo hamutuk ho Reitór UNTL, João Soares Martins abertura seminario nasional ho tema "Reflesaun Nasionál ho Espíritu Rekonsiliasaun, Konstrui no Konsolida Estadu RDTL”. Iha auditoriu fakuldade enjenaria UNTL Hera, kinta (24/02). Imajen Tatoli/Egas Cristovão

DILI, 24 fevereiru 2022 (TATOLI)-Prezidente Repúblika, Francisco Guterres Lú Olo, hateten prátika kulturál rekonsiliasaun ninia espíritu sei metin iha sosiedade Timor-Leste nia leet to’o ohin loron.

Lú olo hato’o asuntu ne’e bainhira halo abertura ba seminariu nasionál ho tema Reflesaun Nasionál ho espíritu rekonsiliasaun, konstrui no konsolida Estadu RDTL” ne’ebé organiza husi Universidade Nasionál Timor Lorosa’e (UNTL), Forum Komunikasaun ba Valór Nasaun (F-KOVANA), iha kampus UNTL Hera, kinta ne’e.

“Iha ona espresaun barak ne’ebé hatudu prátika kulturál Timor-Leste nian katak buka dame liu hosi diálogu no konsolida hanoin ne’ebé lahanesan ka kontráriu malu,  espresaun hanesan dalan ba dame tuur hamutuk ko’alia ba malu, nahe biti boot hatudu momoos no loos espíritu rekonsiliasaun ne’ebé sei metin no buras iha ita-nia sosiedade,”Xefe Estadu hateten.

Tuir nia iha situasaun ohin loron, dala-barak mosu konflitu idea kona-ba dalan saida no dezenvolvimentu saida maka ita hakarak atu atinje.

Maibé kestaun hirak ne’e konsidera normal naran katak ita hotu tenke tau nafatin sentidu nasionalismu ba Timor-Leste ninia independensia.

“Soberania sei laiha sentidu karik ita laiha kapasidade atu hari’i kondisaun ne’ebé konkretu hodi hamenus ki’ak no hasa’e moris-di’ak ho dignidade ba ita-nia Povu” Lú Olo hateten.

Nia dehan aspirasaun hirak ne’e  ita tenke hili dalan saida mak ita atu tuir no iha prosesu hili ne’e mak mosu diverjénsia.

“Ita-nia kultura fó ona prátika hirak ne’ebé bele tulun ita atu hakat liu dezafiu sira ne’ebé mosu iha prosesu afirma soberania ne’ebé ita konkista hikas fali ona,” Nia dehan.

Maibé, Prezidente Repúblika nafatin garante estabilidade no pás tuir kompeténsia Prezidente Repúblika nian, buka hakat liu krize hotu-hotu liuhosi diálogu no hamenus diferensa hanoin hodi buka pontu konverjénsia.

“Ha’u la tau sees diferensa no la hamenus sira-nia valór. Dala ida tan ha’u apela ba Timoroan tomak atu foka ba buat ne’ebé kesi ita hamutuk  tanba ida-ne’e mak sei fó kbi’it mai ita atu tau ita- nia objetivu estratéjiku sira ba iha realidade,”Nia hateten.

Iha tempu independénsia ohin loron nian,  iha sentidu maka kria dezenvolvimentu hodi lori moris di’ak no hari’i futuru ida ho dignidade ba ita-nia povu. Tanba se laiha dezenvolvimentu mak sei laiha pás, justisa, liberdade.

Jornalista: Nelson de Sousa

Editór: Agapito da Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here