Komunidade ne’ebé hela iha mota-ninin no mota-laran área Comoro kontinua hetan inundasaun hafoin udan-boot iha foho Kasnafar no Aileu, segunda, 21/2/2022.Imajen TATOLI/António Dasiparu

DILI, 24 fevereiru 2022 (TATOLI)— Sekretária Estadu Protesaun Sivíl (SEPS), Joaquim Gusmão, hateten nia parte kontinua alerta ba komunidade sira iha territóriu Timor-Leste hodi kuidadu an iha tempu udan, nune’e bele hadook an hosi dezastre naturál.

Alerta hosi SEPS ne’e ho baze ba udan bo’ot ne’ebé akompaña anin, hahú hosi loron 19 to’o 21 fevereiru, konsege hamate ema na’in-tolu no estraga komunidade nia uma iha munisipiu Dili, Bobonaro, Ermera, Manatuto no Rejiaun Administrativu Espesiál Oé-cusse no Ambeno (RAEOA).

Sekertáriu Estadu Protesaun Sivíl, Joaquim José Gumão dos Reis Martins. Imajen Tatoli/Francisco Sony

“Ita hotu tenke kuidadu an iha tempu udan no anin, nune’e ita bele salva an hosi dezastre naturál sira. Liuliu akompaña mensajen alerta ne’ebé fahe liuhosi telefónika,” Sekretáriu Estadu ne’e hateten ba Agência TATOLI iha nia knaar fatin-Cacoli, kinta ne’e.

Notísia relevante: Autoridade Protesaun Sivíl sei kriminaliza komunidade harii uma iha fatin risku

Daudaun ne’e, SEPS servisu hamutuk ho operador telekomunikasaun sira atu pasa informasaun alerta ba komunidade sira liuhosi telefónika atu populasaun kuidadu an iha tempu udan.

“Husu atu komunidade fó importansia ba mensajen sira atu asegura ita nia vida liuliu iha tempu udan ne’ebé akompaã mós anin,” nia fó hanoin.

Iha Bobonaro udan bo’ot iha loron 19 fevereiru rezulta uma tolu mak hetan inundasaun iha suku Purugua, postu Cailaco no iha loron 21 akontese mós udan bo’ot ne’ebé akompaña ho anin hodi estraga uma komunidade ida iha suku Holsa, Maliana Villa inklui iha aldeia Sibuni konsege hamate joven ida Marciano de Jesus ho idade 21 no nia aman Albano Mau Loes idade 62.

“Tuir informasaun sira nain rua fila bainhira ba  simu osan veteranu nian, hafoin hakat mota maka mota lori, SEPS halo ona intervensaun hodi fó apoia emerjénsia ba família vítima ne’e”, Joaquim Gusmão relata.

Iha munisípiu Ermera, udan boot ne’ebé akompaña ho anin, iha loron 21 halo ai-tohar hanehan mate Deometrio dos Santos ho idade 66 iha aldeia Oetete, suku Manusae, postu Hatoli.

Alende ne’e, iha loron hanesan iha aldeia Borhei, suku Humboe, postu Hatolia, udan bo’ot rezulta inundasaun hodi estraga uma komunidade tolu.

Nune’e mós iha Munisipiu Manatutu Postu kuaje uma kain 10-resin mak bee tama nia uma liuliu iha suku Sau, postu Manantuto Villa,

“Ita nian ekipa Bombeiru halo tiha verifikasaun didi’ak ba uma kain hirak ne’e, iha uma kain tolu de’it  maka  hetan afetasaun bee tama sira nia uma,” nia afirma.

Iha munisípiu Dili, inudasaun afeta ba uma-kain 90 ne’ebé hela iha Mota Comoro laran, ne’ebé evakua ona ba sentru akollimentu provizóriu Dom Bosco Comoro.

Entretantu, iha RAEOA iha uma tolu mak bee tama no hetan estragu total iha suku Naimeco, nune’e ekipa SEPS halo intervensaun hodi fó apoia emerjénsia ba vítima-sira.

“Vítima sira ne’ebé maka heta dezastre iha munisípiu sira hanesan Bobonaro, Ermera, Manatuto, Dili, inklui RAEOA ita fó hotu ona apoia emerjénsia ba sira,” Governante ne’e relata.

Notísia relevante:SEPS apoia hahán ba vítima inundasaun iha área mota Comoro

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here