Administradór Munisípiu Covalima, Francisco de Andrade. Imajen Tatoli/Celestina Teles.

COVALIMA, 24 Fevereiru 2022 (TATOLI) – Administradór Munisípiu Covalima, Francisco de Andrade, husu ba joven sira atu kontribui ba estabilidade durante iha  kampaña  to’o eleisaun prezidensiál.

“Administradór husu ba joven sira katak,  tau iha imi nia kakutak, estabilidade ne’e importante, seguransa la’os iha PNTL nia liman maibé  iha ita nia liman, nu’udar sidadaun di’ak tenke iha kontribuisaun ba nasaun ida ne’e liuhosi estabilidade”, Autoridade Covalima, hateten ba Tatoli, iha nia kna’ar fatin kampu-baru, ohin.

Andrade informa, sidadaun hotu iha partidu, nia objetivu mak dezenvolvimentu nasionál, maibé sidadaun sira nia kontribuisaun ba estabilidade ne’e importante, iha munisípiu to’o iha postu administrativu sira.

“Ita hotu iha partidu, ita nia objetivu mak dezenvolvimentu ba nasaun ida ne’e, kontribuisaun sidadaun hotu ida ne’e mak importante, ita garante estabilidade iha munisípiu to’o iha baze la´os de´it iha munisípiu”, afirma.

Francisco husu ba lideransa komunitária sira iha munisípiu Covalima hodi hato’o mensajem ba joven sira iha suku, kria pás no estabilidade durante hahú kampaña to’o iha eleiesaun prezidensiál.

Segundu komandante PNTL Munisípiu Covalima, Superintende Asistente, Albino Mauzino, reforsa PNTL Covalima prontu no garante seguransa durante kampaña to’o eleisaun prezidensiál.

“Ami prontu ona  servisu hamutuk ho autoridade lokál no  juventude hothotu haree ita nia seguransa adekuadu ne’ebé mai hosi ita ida-idak nia liman  ba kampaña to’o hakat ba sentru votasaun sidadaun sira ho konsiénsia rasik ezerse sira nia direitu tuir kandidatura ne’ebé  nia hakarak”, katak

PNTL hala’o nia servisu hodi fó  seguransa  tuir lei ne’ebé vigór ona iha Timor-Leste ne’ebé hakarek ona  iha konstituisaun RDTL 147 fó nia kompeténsia hodi garante seguransa ba sidadaun sira.

“Seguransa iha ita nia liman rasik, ofisiál seguransa kominitária (OPS) sai hanesan ita nia liman ain, ne’ebé ita tau fi’ar no hetan formasaun oioin seguransa hamutuk ho PNTL iha momentu ita desloka ba sentru votasaun, ita Covalima tau ita nia neon ida, laran ida, lori Covalima  la’o ba oin  ho prospriedade”, revela.

Tuir konstituisaun RDTL  Artigu 147  Polísia no forsa seguransa sira:

  1. Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.
  2. Prevensaun kriminál tenke hala’o ho respeitu ba direitus umanus.
  3. Lei maka sei harii rejime ba polísia no mós forsa seguransa seluk.

Jornalista : Celestina Teles

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here