Konsellu Imprensa realiza validasaun peskiza kona-ba publikasaun media relasiona ho sensivel ba jeneru. Iha salaun Konsellu Imprensa, kinta (24/02). Imajen Tatoli/Francisco Sony

DILI, 24 fevereiru 2022 (TATOLI) – Conselho de Imprensa (CI-sigla portugés) ho Programa Nasaun Unida ba Dezenvolvimentu (UNDP-sigla inglesh) prodúz matadalan reportajen kona-ba violénsia bazea ba jéneru.

“Entaun objetivu hosi validasaun ba matadalan ne’e mak peskizadór halo entrevista ba ita-boot sira-nia fatin mak bele prodúz ba livru ida no sai matadalan ba reportajen jornalista nian kona-ba violénsia bazea ba jéneru”, Diretór Ezekutivu CI, Rigoberto Monteiro, ba jornalista sira, Quintal-Boot, ohin.

Reprezentante UNDP iha Timor-Leste, Lívio Xavier, hateten objetivu hosi matadalan ne’e mak atu ajuda jornalista sira oinsá hakerek ba asuntu kona-ba sensível ba jéneru.

“Tanba jornalista sira mak sai pilar importante atu partisipa ba asuntu violénsia kontra igualdade jéneru, entaun ita presiza matadalan atu oinsá bele uza termu loloos ba ida-ne’e”, afirma.

Iha fatin hanesan, Diretora Programa Monitorizasaun Sistema Justisa (JSMP), Ana Paula Marcal, agradese ba kolaborasaun entre CI ho UNDP tanba bele inisia ona matadalan ba reportajen jornalista sira.

“Tanba durante ne’e ami-nia observasaun ba mídia nasionál hotu, sira-nia kobertura la sensível tanba ita haree ita-nia vítima nia oin la blur inklui vítima nia identidade”, katak.

Ana subliña kata kobertura ba feto no labarik feto mak ladún iha sensível iha kontestu naran sei tau kompletu ka dala ruma naran tau inisiál ona maibé nia suku no inan-aman sai nafatin.

“Ida-ne’e ami nota desde tinan rua kotuk maibé ita esforsu no servisu hamutuk ho CI ho Sekratária Estadu Igualdade Inkluzaun (SEII) fó formasaun liga ho asuntu kobertura ba vítima feto no labarik feto sira”`, salienta.

“Espera liuhosi matadalan ne’e ita-nia maluk jornalista sira bele hakerek ho sensibilidade ba vítima liu-liu ita-nia feto no labarik feto tanba ho hakerek ne’ebé la sensível mak bele halo ita-nia vítima sente la konfortável bainhira sai ba públiku,”

Nia afirma, matadalan ne’e sei iha kritériu ka rekezitu no termu jurídiku ne’ebé jornalista presiza halo tuir no mós tenke konfendesionalidade ba família.

CI ho UNDP prodús matadalan reportajen ba jornalista nian kona-ba violénsia bazea ba jéneru (VBJ). Produtu ne’e UNDP ho CI mak inisia no asina iha tinan kotuk no la konsege realiza tanba sirkuntánsia COVID-19.

Jornalista : Osória Marques

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here