Xefi suku Triloka, Alexandre da Costa. Imajen espesiál

BAUCAU, 24 fevereiru 2022 (TATOLI) – Autoridade suku Triloka daudaun ne’e hahú identifika no aprova ona benefisiáriu na’in-sia hosi aldeia tolu hodi hetan apoia subsídiu konstrusaun Uma Kbiit Laek (UKL) iha tinan ne’e.

Xefe suku Triloka, postu administrativu Baucau Vila, munisípiu Baucau, Alexandre da Costa hateten, liuhosi enkontru konsellu suku ho kandidatu benefisiáriu iha suku Triloka deside ona benefisiáriu na’in-sia kompostu hosi kada aldeia Bacadae, Baduho’o no Lekiloiwatu.

“Ami foti dadus hosi benefisiáriu sira, ami halo avaliasaun no deside ema na’in-sia mak sei hetan UKL tinan-ne’e,” Xefi Suku hateten iha Triloka, kinta ne’e.

Tuir planu semana oin parte koordenadór sira halao ona kuotasaun depois avalia hodi hato’o ba kompaña fornsesedór bazea ba orsamentu ne’ebé aloka nune’e bele hahú ona prosesu konstrusaun.

Benefisiáriu na’in-sia refere mai hosi feto faluk na’in-ida no na’in-ualu seluk kategoria vulnerável no defisiente.

“Sira-nia kondisaun uma ladi’ak tebes, mesak uma du’ut didin ho fatuk,” Alexandre akresenta.

Suku Triloka hetan alokasaun orsamentu hosi PNDS tinan 2022 hamutuk $159.318 ne’ebé fahe ba kategória fundu infraestrutura $153.306 no fundu operasionál $6.012.

Autoridade munisipál Baucau hetan alokasaun orsamentu hosi programa UKL hamutuk tokon $1,802,000. Hosi tótal ne’e finansia ba atividade fíziku hamutuk tokon $1,734,000 ba suku 34 no despeza operasionál rihun $68,000.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here