Sekretáriu Rejionál Asuntu Komérsiu no Industria halo vizita kontejia ba konstrusaun merkadu tradisionál Baoknana. Imajen mídia Sekretaria Komérsiu Industria.

OÉ-CUSSE, 23 fevereiru 2022 (TATOLI) – Konstrusaun merkado tradisionál Baoknana ne’ebé lokaliza iha aldeia Citrana, suku Bene-Ufe, sub-rejiaun Nítibe, sei konklui iha fulan abríl tinan ne’e tanba daudaun ne’e progresu fíziku atinje 45%.

Sekretáriu Rejionál ba Asuntu Komérsiu no Industria, Pedro da Silva Boquifai, informa, tuir loloos konstrusaun ne’e liu ona 50%, maibé tarde tanba mudansa klimátika difikulta empreza atu mobiliza materiál hosi Pante Makasar ba Nítibe.

“Konstrusuan tarde oituan tanba udan, maibé tuir kontratu empreza sei termina iha fulan-abríl, tanba merkadu ne’e presiza halo tanba tuir observasaun, negosiante sira fa’an sasán balu tuir de’it iha rai, no ai-mahon sira, entaun autoridade hatama fatin ne’e iha Planu Asaun Anuál iha tinan fiskál 2021 atu hadi’a,” Pedro da Silva Boquifai, informa ba Agência Tatoli iha Kiumaria, Oé-Cusse, kuarta ne’e

Nia fó-sai katak, konstrusaun merkadu tradisionál ne’e autoridade RAEOA hatuur fatuk dahuluk iha dezembru 2021, no tuir kontratu empreza tenke termina obra ne’e iha fulan-abríl 2021, tanba konstrusaun ne’e konstrui ho pakote ida, hanesan uma ba merkadu ho medida 12×8, hariis-fatin públiku ida, postu seguransa no fatin soe lixu unidade-rua nune’e bele fasilita komunidade sira fila-liman ho dignu.

Jestór sub-rejiaun Nítibe, Manuel Tolan, agradese tanba tinan barak komunidade sira uza de’it ai-mahon hodi sai fatin fa’an sasán, maibé tinan ne’e autoridade hahú konstrui fasilidade nune’e bele tulun negosiante sira atu fa’an sasán ho dignu.

Projetu ne’e ezekuta hosi empreza Neno Unipesoál, Lda, ho valór kontratu $57,727.00 ne’ebé aloka hosi Orsamentu Jerál Estadu (OJE) 2021.

Maibé montante orsamentu ne’ebé Agência Tatoli asesu liuhosi livru 3-C (RAEOA-ZEESM) mensiona katak, orsamentu Jerál Estadu (OJE) 2021 ba RAEOA iha tinan fiskál 2021 ho montante $127,000.000.

Hosi montante ne’e koloka $30,000.00 ba konstrusaun merkadu Baoknana (Detailed and Evaluation of Bids for Improvement of Baoknana Market), no projetu ne’e tama iha planu asaun anuál RAEOA nian.

Notisia relevante: RAEOA aloka rihun $57-resin konstrui merkadu tradisionál Baoknana

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan