Juventude Partidu Frente Revolsionáriu Indepedente (Fretilin) realiza konferénsia nasionál. Imajen/Espesiál.

DILI, 23 fevereiru 2022 (TATOLI)-Sekretáriu Jerál Juventude Fretilin, Abrão Saldanha, hateten Juventude Fretilin hakarak haluan tan estrutura husi nivél  nasionál to’o baze.

Abrão dehan planu ne’e sei implementa durante ninia mandatu daruak nu’udar Sekretáriu Jerál Juventude Fretilin ba periodu 2022-2027.

Notísia Relevante :Juventude Fretilin halo konferénsia nasionál hametin identidade

“Dahuluk hametin liután juventude Fretilin iha estrutura nasionál to’o iha baze atu reflete duni organizasaun masa hodi haboot Juventude Fretilin hanesan movimentu sosiál polítika,” Nia hateten ba Tatoli iha ninia servisu fatin, SEJD, Dili, kuarta ne’e.

Konferénsia Juventude Fretilin ne’ebé hala’o iha loron 18 to’o 20 fulan-fevereiru 2022, aprova rezolusaun hamutuk 18 hodi trata vida institusionál juventude Fretilin nian, maibé asuntu rua maka importante liu, dahuluk, haluan estrutura no daruak maka formasaun polítika.

“Daruak mak  kontinua formasaun polítika no patriótika ba kuadru juventude Fretilin  iha nasionál to’o munisípiu, postu administrativu, suku ho aldeia, tanba formasaun bele multiplika atividade sira seluk ne’ebé mak bele kontribui ba objetivu juventude Fretilin,”nia hateten.

Kona-ba haluan estrutura nivel nasionál to’o baze, nia esplika sei realiza reuniaun dahuluk  komisaun polítika nasionál hafoin loron 15 konferénsia nasionál juventude Fretilin foinlalais, hodi bele hili estrutura kompleta.

Membru komisaun polítika nasionál iha ema hamutuk na’in 70 inklui Sekretáriu Jerál ne’ebé eleitu ona.

Atu hili estrutura mak órgaun  komisaun  permanente iha ema na’in 19, adjuntu ho sekretáriu na’in lima, órgaun  komisaun fiskalizasaun iha na’in lima.

“Iha reuniaun dahuluk nia mekanizmu maka sei aprezenta lista entre membru sira  hosi komisaun polítika nasionál  hodi  aprova bele hili,” dehan atuál Sekretáriu Estadu SEJD ne’e.

Aleinde ne’e, sei estabelese sekretáriadu nasionál ne’ebé sei nomea  sekretáriu jerál  hodi nune’e bele kompleta estrutura nasionál.

Juventude Fretilin iha nia estatutu adopta kuota ba jenéru mínimu pursentu 30 (%) hosi baze to’o nasionál tenke envolve feto.

Juventude Fretilin apoiu kandidatu Lú Olo

Nia hateten, rezultadu konferénsia nasionál foinlalais hasai rezolusaun ida hodi apoiu tomak kandidata Prezidente Repúblika periodu 2022-2027, Francisco Guterres Lú Olo hodi kompete iha eleisaun prezidensiál.

Nune’e husu estrutura nasionál to’o baze atu kumpre orientasaun partidu nian hodi mobiliza poténsia masa durante kampaña kandidatu PR Lú Olo nian.

Jornalista: Nelson de Sousa

Editór : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here