Portavóz Asosiasaun Jerasaun Patriota, Memensio Freitas, iha konferensia imprensa iha sede Jerasaun Patriota, Faról, kuarta ne’e.Imajen/Tatoli.Nelson Sousa

DILI, 23 fevereiru 2022 (TATOLI)-Portavóz Asosiasaun Jerasaun Patriota, Memensio Freitas, hateten asosiasaun ne’e sei la fó apoiu ba kualker kandidatu Prezidente Repúblika ba periodu 2022-2027, tanba membru ida-idak sei vota ho konsénsia.

“Iha tempu oin mai mak mosu tan deklarasaun ruma ne’ebé lori ka temi Jerasaun Patriota nia apoiu ba kandidatu ruma, deklarasaun hirak ne’e konsidera nu’udar deklarasaun individual no la reprezenta Jerasaun patriota hanesan asosiasaun,” nia deklara iha konferénsia imprensa iha sede Jerasaun Patriota, Faról, kuarta ne’e.

Notísia Relevante :Jerasaun Patriota estabelese sede iha Baucau hodi konsolida forsa

Bazeia ba estatutu Jerasaun Patriota artigu 7 hateten nu’udar asosiasaun apartidaria katak sei la halis ba forsa ka kbi’it partidu polítika ida tanba ne’e, membru sira hotu tenke respeita naran asosiasaun no hatur iha fatin loloos.

Maibé Asosiasaun Jerasaun Patriota respeita no tane aas liberdade membru sira-nia hodi partisisa iha vida polítika ne’ebé garante iha Konstituisaun RDTL artigu 46.

“Ba membru hotu partisipa ho maturidade no konsiénsia tomak iha festa demokrásia ida-ne’e hodi fó imi-nia votu ba kandidatu ne’ebé tuir imi matan fihir no apoiu ho konsiénsia rasik,” nia hateten.

Tuir kalendariu kampaña eleitorál ba eleisaun Prezidensiál periodu 2022 to’o 2027 sei hahú iha marsu 2022, tanba ne’e husu ba membru asosiasaun sira atu evita halo defamasaun hasoru kualker kandidatu.

“Jerasaun  Patriota prontu kontribui ba paz no estabilidade iha ámbitu eleisaun prezidensiál no husu sidadaun hotu  atu hamoris no haburas nafatin sentidu nasionalizmu no patriotismu,” nia hatutan.

Jerasaun Patriota nu’udar asosiasaun ka klibur ida ne’ebé halibur funu na’in nia-oan sira ho ninia vizaun no misaun rasik atu hatutan hikas prinsípiu luta na’in sira nian hodi liberta povu husi ki’ak no mukit no mós kontribui ba dezenvolvimentu nasaun.

Kona-ba totál membru Jerasaun Patriota  na’in hira maka dadaun rejista ona iha organizasaun ne’e, nia relata seidauk iha numeru serteza maibé organizasaun ne’e eziste ona iha territóriu Timor-Leste.

Artigu 46.o Konstituisaun RDTL hateten; (Direitu ba partisipasaun iha polítika)
1. Sidadaun hotu-hotu iha direitu atu partisipa, hosi nia rasik eh liu hosi reprezentante ne’ebé
hili tiha ona tuir demokrasia, ba vida polítika no ba asuntu públiku nian iha rai laran.
2. Sidadaun hotu-hotu iha direitu atu halo no partisipa iha partidu polítiku sira.
3. Konstituisaun no organizasaun ba partidu polítiku sira lei maka regula

Jornalista: Nelson de Sousa

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here