Estudante Ensinu Báziku Ta-Besi Fera-Naben-Fuat, suku Fuat, postu administrativu Iliomar, munisípiu Lautem. Imajen Tatoli Filomeno Martins.

LAUTEM, 23 fevereiru 2022 (TATOLI) – Eskola 28 no postu saúde 13 iha munisípiu Lautem apresia ho projetu parséria umanitária australiana (AHP, sigla inglés) hosi Governu Austrália, hodi fó resposta ba propagasaun suru COVID-19.

Projetu parséria umanitária Australiana ka Australian Humanitarian Partnership ne’e implementa hosi konsórsiu Organizasaun Naun Governamentál (ONG) internasionál lima mak hanesan Care Internasional Timor-Leste (CITL), Oxfam, Caritas Australia, Plan International Timor-Leste no World Vision.

Tanba situasaun Covid-19 ne’ebé mak hahú iha abríl 2020, ho nunee, konsórsiu Plan Internasional halo parseira ho Child Fund hodi implementa porjetu AHP Covid-19 iha munisípiu Lautem foka liubá kombate Covid-19 liuhosi distribuisaun ekipamentu protesaun no prevensaun hodi ajuda eskola 28 no postu saúde 13 iha postu administrativu Lautem no Iliomar hodi kombate Covid-19. 

Projetu AHP Covid-19 ne’e implementas hahú iha fulan-juñu 2020 no sei termina iha fulan-marsu 2022. Liuhosi parseria entre Child Fund no Plan International, nunee implementasaun projetu refere iha munisípiu Lautem hala’o hosi Child Fund.

Livelihood Coordinator Child Fund, Gonçalo Ximenes, haktuir atu buka-tuir utilidade hosi fasilidade sira-ne’e mak parte hosi konsórsiu halo vizita monitorizasaun ba atividade projetu ne’ebé mak durante ne’e implementa ona iha Iliomar.

“Durante ne’e, Child Fund apoia ona eskola sira iha postu administrativu Lautem no Iliomar, ho totál eskola 20-resin mak hetan apoia hosi projetu AHP Covid-19 response. Materiál ne’ebé ita apoia ba eskola sira-ne’e, relasiona ho prevensaun COVID-19 nian, hanesan tanki bee-moos, balde, fase-liman, sabaun no matérial ijiene seluk,” nia haktuir.

Nia dehan, entre eskola sira-ne’e, maioria ensinu báziku no ensinu sekundária haat mak hetan apoia ne’e. Child Fund mós apoia ekipamentu ne’ebé hanesan ba postu saude 13 inklui sentru saúde Iliomar.

“Postu saúde 13 hosi postu administrativu Lautem no Iliomar mak simu apoiu hirak-ne’e. Ba tinan ida ne’e, postu saúde tolu iha postu administrativu Luro maka ita fó tán tulun. Ne’ebé ita sei distribui tán tanki fase-liman ho tanke rezervatóriu bee nian ba postu saúde sira iha postu Luro hotu,” Ximenes hateten.

Koordenadór Ensinu Baziku Ta-Besi Fera-Naben-Fuat, Alégria David, hateten, relasiona ho parte COVID-19, Child Fund apoia ona sabaun, balde, no materiál ijiene seluk hodi uza ba fase-liman.

“Iha mós panfletu sira-ne’ebé mak ami hatudu ba labarik sira hodi esplika liután kona ba medida prevensaun COVID-19 nian mak hanesan uza máskara, fase-liman no mantein distansiamentu sosiál,” nia akresenta.

“Ami sente haksolok tanbsa ekipamentu hirak-ne’e ami mós utiliza iha eskola, atu ami-nia oan sira-ne’e bele livre hosi moras COVID-19. Materiál hirak-ne’e funsiona ho di’ak, maibé balun mak aat ona, no sira ne’ebé sei di’ak ne’e ami sei kuidadu atubele uza nafatin,” nia hatutan.

Xefe Postu Suade Iliomar, Narçisio Camões. Imajen Tatoli/Filomeno Martins.

Xefe postu saúde Iliomar, Narçisio Camões, hateten, kooperasaun ne’e importante tebes hodi halo prevensaun ba Covid-19 nomoos espalla informasaun kona-ba vantajen vasinasaun ba komunidade.

“Child Fund apoia ona sasán sira mak hanesan, material balde sira-ne’e, ho tán sabaun, ekipamentu sanitáriu. Ami agradese wain ba parte Child Fund, tanba ho sira-nia prezensa iha Iliomar, bele ajuda ona ami hodi servisu hamutuk, ba atende komunidade, liuliu iha vasinasaun no prevensaun Covid-19,” nia katak.

Jornalista         : Filomeno Martins

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here