Ekipa Timor-Leste no Kamboja atake malu. imajen/geoogle

DILI, 23 fevereiru 2022 (TATOLI)— Treinadór Prinsipál Selesaun Nasionál Timor-Leste U-23, Fabio Joaquim Maciel da Silva, hateten daudaun ekipa Timor-Leste preparadu hasoru ekipa zigante Vietname iha semi finál The ASEAN Football Federation (AFF) U-23 Championship 2022, iha Kamboja, kinta (24/02), kalan.

“Ita nia ekipa agora preparadu atu joga hasoru Vietname, maibé ita nafatin respeita sira hanesan ita nia adversáriu tanba ita nia tarjetu mak manán, maibé jogu mak ita haree,” Treinadór ne’e hateten ba Agência TATOLI via telefónika, kuarta ne’e.

Notísia relevante:  Jogu AFF Cup U-23, Timor-Leste manán Brunei 3-1 

Nia dehan, iha jogu rua ba kotuk ne’ebé ekipa Timor-Leste manán to’o tama semi finál la’ós fasil, maibé ho respeitu no hakraik an ne’ebé aumenta ho esforsu mak to’o ikus halakon Brunei Darusalam no Kamboja.

Nune’e, Fabio dehan hanesan treinadór orienta ona jogadór sira atu joga ho di’ak atubele marka istória foun ba Timor-Leste iha mundu futeból.

Timor-Leste lidera Tabela klasifikasaun Grupu A iha jogu AFF Cup U-23 2022. imajen/ espesial

Kona-ba kondisaun jogadór, nia afirma maioria kondisaun di’ak hotu no prontu atu kompete iha jogu iha semi finál AFF Champions U-23 ne’e.

“Jogu ne’e importante tebes ba ita, ha’u ko’alia ona ho jogadór sira ita tenke esforsu atubele manán tanba ne’e istória ida ba Timor-Leste,” nia enkoraja.

Daudaun ne’e, ekipa Timor-Leste mak lidera grupu A ho pontu hitu, enkuantu Kamboja ho pontu neen. Pontu hira ne’e ekipa lafaek rekolla hosi jogu dahuluk empate ho Filipina 2-2, iha jogu daruak mantein iha nia pozisaun hodi manán Brunei DaruSalam 3-1 no jogu ikus hasoru Kamboja manán 1-0.

Notísia relevante:  Manán Kamboja 1-0, FFTL louva jogadór no treinadór Timor Leste

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here