Estudante sira halimar iha resintu Eskola EBF Halilik Daliri, iha suku Uabubu. Imajen TATOLI/Vitorino Lopes da Costa

VIQUEQUE, 23 fevereiru 2022 (TATOLI)–Koodenadór Ensinu Báziku Filial (EBF) Halilik Daliri iha suku Uabubu, postu Ossu, munisípiu Viqueque, Henrique das Neves da Silva, hateten, eskola ne’e menus profesór no sala aula limitadu.

“Ami-nia eskola enfrenta menus profesór no edifísiu eskola ho kondisaun ladi’ak, tanba bainhira edifísiu eskola di’ak, ita-nia estudante bele tuir atividade aula prezensiál ho susesu,” Koordenadór Eskola hateten ba Agência TATOLI, iha Eskola EBF Halilik Dalirisi, iha suku Uabubu, kuarta ne’e.

Notísia relevante: Konstrusaun eskola 18 iha Viqueque hahú fevereiru

Tuir Henrique, presiza kria kondisaun eskola di’ak  ba estudante sira tanba estudante nu’udar futuru ba nasaun, tanba ne’e maka Governu presiza tau atensaun ba kondisaun eskola sira.

“Ami-nia rekursu atu hanorin estudante limitadu tebes, nune’e iha oportunidade ne’e ha’u hakarak husu ministériu relevante aumenta profesór hodi lori estudante ba futuru ne’ebé di’ak,” nia sujere.

Iha EBF Halilik Daliri, komunidade ho inisiativa rasik sosa kalen hodi taka uma eskola atu fasilita oan sira asesu ba edukasaun ho kondisaun di’ak.

“Kada tinan ami haree kalen sira a’at, ami hasai tiha mak troka fali, maibé kalen sira ne’e komunidade maka ho inisiativa tau osan hamutuk  hodi sosa. Tanba  durante ne’e, ami la hetan apoiu ruma hosi parte Governu,” nia haktuir.

Eskola ne’e kompostu hosi primeiru no segundu siklu, ne’ebé iha sala tolu de’it.

“Ami hakarak aumenta tan sala tolu hodi fó espasu ba ita-nia estudante sira tuir aula prezensiál,” Koordenadór eskola tenik.

Antes ne’e parte eskola hato’o ona pedidu ba Ministériu Edukasaun Juventude no Desportu (MEJD).

Komunidade, Konsellu suku no veteranu mak harii Eskola EBF Halilik Dalirisi iha tinan 2014, nune’e iha tinan 2018 iha edifísiu tolu ne’ebé mai hosi pakote referendu, maibé anin konsege estraga sala tolu halo sobu totál.

Númeru estudante iha eskola ne’e hosi primeiru no segundu siklu hamutuk na’in-76, profesór permanente ida no voluntáriu ida.

Jornalista : Vitorino Lopes da Costa

Editóra     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here