Serimonia ritual kultura /iha Covalima/imajen tatoli /Celestina Teles

COVALIMA, 23 fevereiru 2022 (TATOLI) – Komisaun Nasionál Eleisaun (CNE-sigla portugés) realiza serimónia rituál kulturál tuir tradisaun Munisípiu Covalima hodi garante pás no estabilidade nasionál durante kampaña no eleisaun prezidensiál (Elpres) periódu 2022.

“Ohin lia-nain hosi postu administrativu hitu hamutuk iha ne’e, hodi halo rituál kulturál tuir tradisaun Munisípiu Covalima ni’an hodi haree fahi aten, maibé hosi fahi  aten ne’e hatudu sinál pozitivu”, lia-nain, Anacleto Amarál hato’o ba jornalista sira, iha edifisíu CNE  kampung-Baru, ohin.

Serimónia rituál ne’e, hanesan meiu ida atu harohan ba bei-ala no eroi sira,  haraik matak malirin mai komunidade tomak hanesan mós manifestasaun ida atu hato’o  mensajen no rekomendasaun ba povo, espesiál komunidade iha Covalima no kandidatura ne’ebé mak atu konkore iha eleisaun preziensiál.

Lia -nain sira mós husu ba  kandidatura Prezidente Repúblika  kria unidade,  pás no estabilidade ho laran moos, bainhira eleitu ba Xefe Estadu.

Komisáriu  CNE destakadu Munisípiu Aileu no Covalima, Carlito Martins,  hateten CNE organiza rituál ida ne’e, atu hamulak ba lisan iha timor-laran tomak espesiál kultura munisípál antes tama kampaña polítika.

“Ita realiza rituál kulturál ida ne’e  ezije ba  kandidatu sira atu iha obrigasaun hodi obedese regra no proisedimentu legál ne’ebé regulariza iha prosesu kampañia  politíka iha eleisaun prezidensiál”, katak.

Martins mos solisita ba kanditatura Prezidente Pepúblika atu divulga programa, planu estratéjiku no hasai linguajen no mensajen ba povu kona-ba dezenvolvimentu nasionál, interese Estadu nian no labele uza lian provokativu.

Nia salienta katak prosesu eleisaun ne´ebé livre, justu no pás tuir prinsípiu konstituisaun no  lei sira mak kandidatura sira mós tenke fuan bo’ot no ulun malirin atu simu rezultadu eleisaun.

Iha sorin seluk, Administradór Munisípiu Covalima Francisco de Andrade, dehan serimónia ritual ne´e realiza ho objetivu atu atu kria pás no estabilidade iha Covalima durante periódu kampaña to’o eleisaun prezidensiál no esklui baze konflitu.

“Ita hotu hatene kandidatura  Prezidente Repúblika sira sei halo kampaña, maibé sira iha direitu ne’ebé hanesan, nune’e presija ita hotu nia kontribuisaun atu labele sai baze ba konflitu  maibé sai baze ba unidade”, hateten.

Francisco rekorda katak, durante tinan hirak liu ba, Covalima nunka hamosu  problema durante prosesu eleisaun.

Iha serimonia refere partisipa hosi, Komisariu CNE, Administradór Munisípiu Covalima no Komandante F-FDTL Postu Tilomar,

Tuir planu, CNE sei halo enseramentu ba serimónia rituál kulturál iha loron 28 fulan fevereiru tinan ne’e, iha sede nasionál CNE.

Jornalista : Celestina Teles

Editor : Zezito Silva.

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here