Komandante PNTL, munisípiu Bobonaro, Superintendente Antoninho Mau-luta. Imajen Tatoli/Sérgio da Cruz.

BOBONARO, 22 fevereiru 2022 (TATOLI) – Udan-boot ne’ebé akontese iha loron-segunda ne’e halo mota Laku ne’ebé baliza entre suku Sibuni no Ai-asa, postu administrativu Bobonaro, munisípiu Bononaro, hamate aman no oan.

Komandante Polísia Nasionál Timor-Leste (PNTL) munisípiu Bobonaro, Superintedente Antoninho Mauluta, fó-sai katak aman no oan ne’e mate iha tuku 16.00 lokraik.

“Iha tuku 16.00 lokraik udan boot, mota Laku lori sidadaun Sibuni na’in-rua nu’udar aman no oan, tuir informasaun ne’ebé ami simu, sira na’in-rua oras ne’e lakon vida hotu ona,” nia ko’alia komandu PNTL Bobonaro, tersa ne’e.

Sidadaun na’in-rua ne’e orijen hosi aldeia Sibuni, suku Sibuni, postu administrativu Bobonaro, munisípiu Bobonaro. Vítima Albano Mauloe ho tinan 62 nu’udar aman no Marçiano de Jesus nu’udar oan,  hosi uma-lisan Cuepou. Matebian Albano husik hela oan na’in-hitu kompostu hosi feto haat no mane tolu.

Enkuantu nia oan mane naran Merçiano de Jesus tinan 22 ne’ebé remata ona nia estudu sekundária jerál iha tinan 2016 iha kapitál Dili.

Tuir kronolojia sidadaun na’in-rua ne’e iha segunda dadeersan sai hosi Sibuni, suku Sibuni  ho objetivu atu foti osan iha Banku Maliana.

Hafoin ne’e sidadaun na’in-rua fila ba to’o dalan área Bobonaro Vila akontese udan-boot, sira nafatin tún ba mota laran no iha momentu ne’ebá iha ema kuzae 20-resin mak hein iha mota-ninin atu ultrapasa.

Maibé tanba hein kleur, rai hahú nakaras no kestaun distánsia hosi mota ba uma mós sei dook, Albano tenta ultrapasa mota Laku nee, maibe foin hatún ain ba bee-laran korrenta mota baku monu kedas ba bee laran.

Nune’e iha momentu ne’e, nia oan Marçiano haksoit tuir kedas atu ba dada, maibé asaun eroíku ne’e la konsege susesu tanba korrente mota boot lori lakon kedas sira na’in-rua dala-ida.

“Iha tempu ne’e kedas komunidade sira sai hotu buka-tuir kedas, hetan uluk nia aman iha área Ual-Gomo, maibe ninia oan mane ohin dadeersan tuku 08.00 dadersan mak hetan ho distánsia ne’ebé dook iha área Anapal maibé ho kondisaun mate hotu ona,” Superintendete ne’e haktuir.

Komandante ne’e subliña, dadaun ne’e mate-isin parte operasaun eskuadra Bobonaro inklui komunidade sira entrega ona ba família hodi halo prosesu funerál tuir kultura Bunak, uma-lisan Cuepou no Houhilin nian.

Relasiona ho kazu ne’e, Xefe suku Sibuni, João da Cruz Lopes, reprezenta komunidade sira husu ba parte kompetente atu tau atensaun ba kestaun ne’e hodi halo konstrusaun ponte foun nune’e  mota labele fó ameasa beibeik ba populasaun nia vida.

“Ha’u rekomenda ba Governu tau ona problema ne’e iha planu prioridade tinan oin, durante ne’e tempu udan, ponte laiha ami halo movimentu ba mai ladi’ak, tantu la’o-ain no transporte, tanba laiha dalan alternativu seluk mak ami atu ultrapasa, só úniku dalan ida iha mota laran ne’e de’it,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here