Diretora PNDS, Claudinha Soares Pinto. Imajen TATOLI/Arminda Fonseca

DILI, 22 fevereiru 2022 (TATOLI) – Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares, hateten ema ne´ebé kbiit laek maibé nia oan laiha sei la hetan Uma Kbiit Laek (UKL) tanba bainhira nia mate ema sei la hela.

“Loos duni katak iha komunidade balun ne’ebé merese atu hetan maibé la priénse rekezitu balun, hanesan inan ferik ida moris ho mukit tebes, haree nia kondisaun lá di’ak liu maibé nia oan laiha entaun nia labele hetan uma ne’e”, esplika Diretora ba Tatoli, via telefone, ohin.

Nia akresenta katak maske kondisaun moris lori tristeza tebes maibé labele sai benefisiariu ba UKL tanba bainhira nia mate ema sei hadau malu uma ne´e.

“Ita triste liu ba ferik ne’e maibé nia oan laiha entaun bainhira nia mate sé mak uza. Ho ida-ne’e nia labele sai benefisiáriu ba UKL tanba bainhira nia mate tiha ema sei hadau malu uma ne’e no sé mak sei garante hodi monu ba sé, sustentabilidade, ita mós haree ba kestaun ne’e”, katak.

Tanba ne’e, nia dehan, PNDS la’o tuir matadalan ne’ebé dezeña iha 2020 no matadalan ne’e PNDS halo konsulta públiku hafoin implementa. Tanba atividade ne’e objetivu prinsipál garante moris di’ak sidadaun nian kontribui ba redúz ki’ak.

“Ami PNDS fasilita de’it maibé ita-nia xefe suku sira mak lidera prosesu atividade UKL tomak iha aldeia no suku sira tanba sira mak hatane di’ak komunidade nia kondisaun moris ka kondisaun ekonomia loroloron nian kompara ho ekipa ne’ebé maihosi nasionál”, dehan.

Ministru Administrasaun Estatál (MAE), Miguel Pereira de Carvalho, rekorda katak iha tinan fiskál 2021, MAE liuhosi PNDS konstrui UKL hamutuk 1.254, ne’ebé nia progresu iha munisípiu hotu la’o di’ak no hetan apresiasaun boot hosi komunidade rasik no hetan benefísiu direta.

Tan ne’e, iha tinan 2022, Governu liuhosi Ministéiru Finansa, aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hothotu tanba redusaun 75% hosi orsamentu ne’ebé aloka iha tinan ida-ne’e.

“Deputadu sira propoen tan osan hamutuk $63,600.000 hodi MAE liuhosi PNDS bele implementa Uma Kbiit La’ek iha 2022, aumenta uma 10 kada suku, nune’e Governu prontu atu implementa programa ida ne’e”, konklui.

Lista ema kbiit laek ne’e, bazea ba PNDS nia kritériu haat mak hanaesan, kondisaun uma, kondisaun ekonómia, jeografíkamente no kondisaun fíziku. Tuir nia, kondisuan hirak ne’e PNDS haturur iha manual guia komunidade sira, katak sé mak sai benefisiáriu elizível ne’ebé konserteja tuir duni kondisaun ne’ebé mak iha.

Tinan 2022, benefisiáriu ba UKL ne’e hamutuk 4.000 no kada suku hetan sia to´o sanulu.

Konstrusaun UKL ne’e korresponde ho PLanu Estratéjiku Dezenvolvimentu Nasionál (PEDN) 2011-2030 ne’ebé mak rekoñese povu Timor-Leste nia aspirasaun atu harii nasaun ne’ebé forte prósperu no moris di’ak.

Jornalista: Osória Marques

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here