Logotipu ICS. Imajen/Espesiál

DILI, 22 fevereiru 2022 (TATOLI)—Institutu Siénsia Saúde (ICS, sigla portugés) seidauk realiza inzensaun propina semestre par (faze daruak) ba estudante hamutuk 2.548, maski simu ona transferénsia hosi Ministériu Finansa (MF) hamutuk $382.200.

“Ami-nia pontu vokál ba halo ona reuniaun ho Ministériu Ensinu Superior Siénsia no Kultura, maibé to’o agora ami seidauk ezekuta pagamentu inzensaun propina faze daruak ba estudante sira,” Reitór ICS, Domingos Soares, informa ba Agência TATOLI, via telefónika, tersa ne’e.

Notísia relevante: Universidade 18 sei devolve osan millaun $1-resin hosi inzensaun propina

Antes ne’e, parte Instituisaun Ensinu Superiór Privadu ne’e realiza ona pagamentu faze dahuluk, ne’ebé momentu ne’ebá hetan transferénsia ho totál $430.950 ba estudante hamutuk na’in-1.210.

“To’o agora parte Finansa ICS seidauk pasa informasaun kona-ba prosesu pagamentu faze daruak, tanba ne’e ami sei halo konfirmasaun atu hatene didi’ak prosesu,” nia akresenta.

ICS iha fakuldade Siénsia no Saúde de’it, ho kursu hanesan Enfermajen, Farmásia, Parteira, Biomédika no Laboratóriu, no Nutrisaun.

Instituisaun Ensinu Superiór Públiku no Privadu hamutuk 18 mak hetan direitu ba subsídiu ho totál $5.428.394 ba estudante hamutuk 66.106.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here