Jornalista Agência TATOLI, I.P halo entrevista ho Diretór Ezekutivu TrandeInvest, Arcanjo da Silva, iha ninia knaar fatin, Colmera, tersa (22/02). Imajen/Mídia TradeInvest

DILI, 22 fevereiru 2022 (TATOLI)–Governu Timor-Leste deside kansela partisipasaun iha fórum non petróleu iha Expo Dubai 2020, ne’ebé tuir loloos realiza iha loron 24 fevereiru 2022.

“Ba preparasaun ita gasta ona $30.000. Ami hanesan diresaun tékniku ne’ebé organiza sente ladún furak, bainhira ita publika ona setór sira ne’ebé atu partisipa. Ekipa TradeInvest ne’ebé halo preparasaun fila ona iha loron 18 fevereiru no preparasaun halo hamutuk ho Dubai Chamber hotu ona, maibé ikus mai kansela realizasaun fórum negósiu non petróleu ne’e ho razaun nasaun 12 mós kansela sira-nia fórum negósiu, nune’e mós tanba COVID-19 variante Omicron sa’e maka’as iha Dubai,” Diretór Ezekutivu TrandeInvest, Arcanjo da Silva, informa ba Agência TATOLI, iha ninia knaar fatin, Colmera, tersa ne’e.

Notísia relevanteDelegasaun Timor-Leste sei partisipa fórum negósiu non petróleu iha Dubai

Enkuantu, delegasaun Timor-Leste ne’ebé planeia arranka iha loron 22 fevereiru hamutuk na’in-18, kompostu hosi ministru na’in-haat hanesan Ministru Turizmu, Komérsiu no Indústria nu’udar Prezidente Autoridade Expo Dubai, Ministru Koordenadór Asuntu Ekonómiku, Ministru Agrikultura no Peska, no Ministru Transporte no Komunikasaun.

“Iha desizaun ikus liu, Primeiru-Ministru autoriza Ministru Koordenadór Asuntu Ekonómiku de’it mak bele partisipa,” nia akresenta.

Orsamentu hosi TradeInvest alokadu ba atividade internasionál ne’e hamutuk $40.000, la inklui delegasaun ezekutivu sira.

“Ami uza ona $20.000-resin, osan ne’e uza ba viajen funsionáriu TradeInvest na’in-haat durante semana rua iha Dubai, aleinde ne’e ba prepasaun imprime banner sira,” Diretór ne’e tenik.

Iha konfirmasaun ikus, investidór na’in-20 resin mak partisipa iha fórum internasionál ne’e, maibé tanba deside kansela sedu, nune’e iha de’it investidór potensiál 20 inklui reprezentante nasaun sira iha pavilaun to’o 100.

“Ami otimista tanba setór produtivu hanesan agrikultura, peska, turizmu, transporte komunikasaun hanesan investimentu ne’ebé la presiza kompete, hanesan mós setór petróleu. Tanba ne’e, ho lei investimentu no habadak burokrasia, ami otimista katak investidór sira ne’e sei mai,” nia subliña.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here