Prezidente Konsellu Administrasaun IGE, I.P, Ermenegilda da Costa Laurentina. Imajen TATOLI/Francisco Sony

DILI, 22 fevereiru 2022 (TATOLI)—Prezidente Konsellu Administrasaun Institutu Jestasaun Ekipamentu, Institutu Públiku (IGE, I.P, sigla portugés), Ermenegilda da Costa Laurentina, husu ba komunidade labele liu dalan foun ligasaun Dili-Aileu ne’ebé kotu hodi hein normaliza hikas.

Iha segunda (21/02) akontese udan boot hodi rezulta dalan foun ne’ebé ligasaun Dili-Aileu kotu iha área Tohu-Meta, Salarlala parte bee-tudak (air terjun).

“Ha’u husu komunidade labele liu lai dalan foun air terjun tanba dalan kotu, komunidade labele obriga-an liu. Alternativa mak uza lai dalan ligasaun Dili, ba parte Dare nian, hein IGE normaliza tiha dalan ne’e mak bele liu,” Prezidente Konsellu Administrasaun IGE, I.P hateten ba Agência TATOLI, iha salaun Komisaun Nasionál Eleisaun (CNE, sigla portugés), Colmera, tersa ne’e.

Notísia relevante: SEPS apoia hahán ba vítima inundasaun iha área mota Comoro

Nia dehan, haree ba dalan kotu no mota tuun iha fatin barak, iha segunda kalan ne’e kedan IGE, I.P halo liña koordensaun ho Sekretária Estadu Protesaun Sivíl (SEPS) atu hapara movimentu iha área ne’ebé hetan estragu, nune’e bele fasilita ekipa serbisu iha terrenu.

Enkuantu, daudaun ne’e IGE.IP fó hela apoiu emerjénsia iha fatin afetadu inundasaun hanesan mota ulun Comoro.

Nune’e mós, ekipa institutu desloka ona ba fatin hanesan bee-tudak, Hera, Metinaro, Ermera, Liquicá, no Covalima, atu haree kondisaun hodi destaka mákina pezadu iha fatin afetadu estragu kauza udan-boot.

Kona-ba mákina pezadu rua iha Hera ne’ebé mota lori durante inundasaun, daudaun ne’e akipa iha ona fatin hodi atua maibé seidauk foti sai tanba mota nia volume boot.

“Ita-nia ekipa standby hela hodi haree kondisaun bee, bainhira nia volume tuun ona mak sei mobiliza mákina pezadu eskavatór atubele kee no foti sai mákina pezadu hodi halo manutensaun,” nia akresenta.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here