COVALIMA, 22 fevereiru 2022 (TATOLI) – Komisaun Nasionál Eleisaun (CNE-Sigla Portugés), sei realiza Paktu Unidade iha 23 fevereiru ho objetivu hodi hametin pás no estabilidade iha períodu kampaña eleitorál to´o eleisaun presidensiál 2022.

“Atu realiza Paktu Unidade  ne’e, CNE halo hela preparasaun téknika, tanba desizaun liuhosi plenária iha CNE, nune´e mak ita sei realiza iha loron 23 fulan ne’e”, Diretór CNE Munisípiu Covalima, Hermenegildo de Sena, ba Tatoli, iha nia kna’ar fatin, Kampung-Baru, ohin.

Paktu Unidade sei realiza iha Covalima, iha edifísiu CNE, enkuantu preparativu tékniku atinje ona 65%.

“Ami nia preparasaun atinje ona 65% no ami identifika ona lia-nain sira hosi postu administrativu ne’ebé  mak pertense iha Munisípiu Covalima atu partisipa iha serimónia Paktu Unidade”, nia informa.

Sena haktuir katak Ógaun Eleitorál nia programa la iha mudansa hanesan uluk ne’ebé mak CNE sempre realiza. Iha serimónia ne’e CNE mós sei konvida lia-nain sira ne’ebé mak hetan ona sertifikadu hosi Sekretáriu Estadu Arte no Cultura (SEAC).

Atu realiza serimonia refere, sei konvida Administradór Munisípiu Covalima no postu administrativu sira ne’ebé pertense iha Covalima, Komandante Munisípiu Covalima ho komandante Eskuadra sira, veteranu, Xefe Suku 30 no ekipa susesu kandidatura Prezidente Repúblika.

Hafoin realiza paktu unidade iha nivél munisípiu mak, lia-nain na’in ida, hosi Covalima sei partisipa Paktu Unidade iha CNE Nasionál ne’ebé sei realiza iha loron 28 fulan fevereiru ne’e.

Objetivu hosi Paktu Unidade Nasionál mak atu hametin pás no estabilidade iha Covalima, nune´e iha períodu kampaña eleitorál no eleisaun bele la´o ho harmonia.

Komisaun Nasionál Eleisaun haktuir atribuisaun kompeténsia ne’ebé  mai hosi artigu 65, Konstituisaun RDTL prevé iha pontu 2, artigu 11, Lei nú 7/2016, Lei ba Orgaun Administrasaun Eleitorál, hateten Estrutura Orgánika sekretariadu permanente CNE nian sei aprova tuir Lei, no pontu 3 hosi artigu lei refere, hateten CNE mak sei elabora no aprova rejimentu ba ninia sesaun plenária sira, ne’ebé tenke publika iha Série II do Jornal da Repúblika.

Tuir Konstituisaun RDTL Artigu 65 kona-ba Eleisaun sira

  1. Órgaun eleitu soberania nian ho podér lokál sei hili tuir eleisaun, hosi eleisaun universál, livre, diretu, sekretu ema ida votu ida, no periódiku.
  2. Resenseamentu eleitorál ne’e obrigatóriu, ofisiál no ida de’it no universál no sei atualiza iha eleisaun ida-idak.
  3. Kampaña eleitorál hala’o tuir prisípiu hirak tuirmai ne’e:
  1. Liberdade ba propaganda eleitorál;
  2. Oportunidade no tratamentu hanesan ba kandidatura hotu-hotu;
  3. Imparsialidade na’in ulun boot públiku sira-nian kona-ba kandidatura;
  4. Transparénsia no fiskalizasaun sura votu nian.
  1. Konversaun votu nian iha mandatu hala’o tuir sistema reprezentasaun proporsionál.
  2. Prosesu eleitorál sei regula tuir lei.
  3. Órgaun independente maka sei tau matan ba resenseamentu no eleisaun sira. Lei maka estabelese orgaun ne’e nia kompeténsia, kompozisaun, organizasaun no nia knaar.

Jornalista:Celestina Teles:

Editor: Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here