Prezidente Konsellu veteranu. Vidal de Jesus "Riak Leman". Imajen Tatoli/Francisco Sony.

DILI, 22 favereiru 2022 (TATOLI) – Prezidente Komisaun Konsellu Veteranu Libertasaun Nasionál (CCLN-sigla portugés), Vidal de Jesus ‘Reak Leman’, hateten verifikasaun dadus veteranu rejistadu 2009 nian sei suspende tanba sei halo hela preparasaun ba loron veteranu nian ne´ebé sei akontese iha 3 marsu.

“Ita seidauk verifika veteranu rejistadu 2009 nian tanba ita sei halo preparasaun ba loron veteranu ne´ebé sei realiza iha 3 marsu, tanba ne´e ita sei suspende desde dezembru no aleinde ida-ne’e, Ministériu Asuntu Kombatente Libertasaun Nasionál (MAKLN) mós implementa uluk programa bolsa estudu ba veteranu nia oan sira hafoin bele kontinua”, esplika Reak Leman ba Agência TATOLI, iha nia kna´ar fatin Arte Moris, Comoro.

Nia rekorda katak dadus 2009 komisaun verifika ona ema hamutuk 60.215 kompostu hosi munisípiu Aileu hamutuk 3.577, Ainaro 3.657, Baucau hamutuk 5.755, Bobonaro 5.439, Covalima 5.157, Dili 3.658, Ermera 4.657, Lautém 5.917, Liquiça 5.882, Manatutu 4.478, Manufahi 4.821, Rejiaun Administrativa Espesiál Oé-Cusse Ambeno (RAEOA) 3.441 no Munisípiu Viqueque hamutuk 3.776.

“Barak mak komisaun verifikadór seidauk verifika hotu maibé ami nafatin esforsu atu aselera lalais prosesu verifikasaun ne’e, nune’e bele enkamiña mai iha nasionál hodi verifika tuir, katak ema ida-ne’ebé elizivél ka iha direitu atu simu pensaun ne’e”, nia dehan.

Maibé, nia afirma, iha tempu badak ekipa nasionál sei kontinua fali halo verifikasaun ba dadus veteranu rejistadu iha 2009 no ekipa sei esforsu di’ak liután hodi bele aselera no konklui prosesu ne’e hodi haruka ba nasionál, nune’e ekipa bele kontinua verifika ida-ne’ebé mak iha direitu no ida ne´ebé mak la´e.

Jornalista: Osória Marques

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here