Administradór postu administrativu Cailaco, munisipiu Bobonaro, Alfredo Meta-Dau. Imajen Tatoli/Sergio da Cruz.

BOBONARO, 22 fevereiru 2022 (TATOLI) – Administradór postu administrativu Cailaco, munisípiu Bobonaro, Alfredo Meta-Dau, husu Ministériu Obra Públika (MOP) atu orienta Institutu Jestaun Ekipamentu, Institutu Públiku (IGE,I.P, sigla portugés) normaliza mota iha suku Purugua, ne’ebe fó ameasa ba komunidade nia uma no natar.

“Ami hato’o pedidu ba tiha ona dehan ohin atu mai, maibé tanba kestaun burokrasia uitoan parese seidauk mai, maibé ami nafatin husu ba Governu kompetente atu orienta IGE,I.P halo intervensaun lalais ba mota ne’ebé mak estraga populasaun nia uma,” nia informa ba jornalista sira, iha kna’ar-fatin, segunda ne’e.

Autoridade postu ne’e haktuir, iha sesta semana kotuk bainhira akontese udan boot korrenta bee maka’as baku rahun barrajen mota nune’e bee halai tama fali ba komunidade sira-nia uma hodi rezulta komunidade uma-ka’in tolu afetadu ba inundasaun no bee lori lakon hotu komunidade nia ai-han inklui hare-kulit.

Tanba ne’e nia orienta kedas lider komunitária sira iha suku ne’e atu rekolla dadus kona-ba sasán estragu sira, nune’e relata ba nasional atubele hetan apoia nesesidade emerjénsia no apoia materiál konstrusaun ba rekuperasaun.

“Ha’u tún ba observa iha terrenu fó hatene kedas ba populasaun sira-ne’ebé ke hela besik mota ne’e, muda sees tiha ba fatin seluk. Sé udan boot mak imi sees la biban bele prejudika imi-nia vida, só meiu ida-ne’e de’it mak administrasaun postu bele halo, seluk ne’e kompeténsia Governu Sentrál nian,” Alfredo hateten.

Xefe suku Purugua, Claudino Bere Pelo, reforsa mota refere la’ós foin mak ameasa komunidade sira maibé akontese kedas iha tinan kotuk, IGE konsege halo ona intervensaun hodi normaliza hikas, maibé la kleur de’it udan tun estraga fila-fali hodi rezulta natar barak mak hetan estragu halo agrikultor balu la konsege kolleta.

Nune’e iha loron 22 fulan-novembru tinan kotuk, lider komunitáriu ne’e hato’o fali proposta ba IGE,IP atu kontinua halo intervensaun emerjénsia maibé to’o agora responde.

“Ha’u liga ona munisípiu sira heteten orsida to’o ona, tanba sira agora iha dalan, maibé agora seidauk mosu lahatene bainhira loos, ha’u mós liga ona ba IGE nasionál ko’alia ho sira katak, ami husu took ba prezidente, nia hatún ona despaxu ka seidauk. Sé seidauk sira labele mai, ha’u hirus malu ho sira dehan, sé atu mai dehan loloos, la mai mós dehan de’it atu ami hatene,” nia dehan.

Tuir dadaus monografia suku Purugua, iha aldeia rua kompostu husi aldeia Lesupuh no aldeia Heda ho totál populasaun feto ho mane hamutuk 1.190.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here